ఆ రూపం.. భక్తజన సమ్మోహితం

కొడంగల్‌: శ్రీ మహాలక్ష్మీ వెంకటేశ్వరస్వామి బ్రహ్మోత్సవాల్లో భాగంగా గురువారం ఉదయం మోహినీ అవతార ఉత్సవం నిర్వహించారు. ఈ సందర్భంగా ఆలయ పండితులు ధరూరి శ్రీనివాసాచార్యులు మోహినీ రూప విశిష్టతను భక్తులకు తెలిపారు. క్షీరసాగర మధనం జరిగినప్పుడు వెలువడిన అమృతాన్ని రాక్షసులకు అందకుండా చేసేందుకు స్వామివారు ఈ రూపాన్ని ధరించారన్నారు. అందుకోసం భక్తులు ఈ రూపంలో స్వామివారిని నేరుగా చూడకుండా స్వామి ప్రతిబింబాన్ని అద్దంలో చూడాలన్నారు. ఉత్సవంలో సైతం స్వామి ముందు దర్పణం ఏర్పాటు చేసి భక్తులు అందులో చూసేందుకు అనుమతిచ్చారు. అంతకు ముందు ఎమ్మెల్యే పట్నం నరేందర్‌రెడ్డి స్వామివారికి పట్టు వస్త్రాలు సమర్పించారు. ఆయనతోపాటు కౌన్సిలర్‌ మధుసూదన్‌ యాదవ్‌, తదితరులు పాల్గొన్నారు.