రుణ యాప్‌ బాధలకు తాళలేక వ్యక్తి అదృశ్యం

త్రిమూర్తులు

మూసాపేట: రుణ యాప్‌ బాధలకు తాళలేక  ఓ వ్యక్తి ఇల్లు విడిచి వెళ్లిపోయాడు. ఏపీలోని రాజమండ్రి సీతానగర్‌ మండలం బొబ్బిలిలంక గ్రామానికి చెందిన కె.త్రిమూర్తులు (39), అతని సోదరుడు వినయ్‌, మిత్రుడు ప్రశాంత్‌రెడ్డి కలిసి కూకట్‌పల్లి రామయ్యనగర్‌లోని ఓ ఇంట్లో ఉంటున్నారు. త్రిమూర్తులు మియాపూర్‌లో ఓ హోటల్‌ నిర్వహిస్తున్నాడు. ఈనెల 23 నుంచి అతను కన్పించడం లేదు. వినయ్‌కు వాట్సాప్‌లో ఓ సందేశం పంపాడు.. ‘ఓ రుణ యాప్‌ నుంచి తాను అప్పు తీసుకున్నానని.. వారి వేధింపులకు తాళలేక వెళ్లిపోతున్నా’నని పేర్కొన్నాడు. అప్పటి నుంచి అతని ఫోన్‌ స్విచ్చాఫ్‌ అయింది. దీంతో పోలీసులకు ఫిర్యాదు చేశారు.