జాతీయ రహదారిపై వెలిగిన వీధి దీపాలు

పరిగి, న్యూస్‌టుడే: పరిగి పట్టణం మీదుగా వెళ్లిన జాతీయ రహదారిపై వీధి దీపాలు వెలగడం లేదు. దీంతో ప్రజలు, వాహన చోదకులు ఇబ్బందులు పడుతున్నారు. ఈ విషయమై ‘వెలుగులు పంచవు.. వెతలు తీరవు’ అనే శీర్షికతో ఈనెల 14న ఈనాడులో ప్రచురితమైన కథనానికి సంబంధిత అధికారులు స్పందించారు. పురపాలక సంఘం అధికారులు నేషనల్‌ హైవే, ట్రాన్సుకో అధికారులతో మాట్లాడారు. చివరకు గురువారం రాత్రి సెంట్రల్‌ లైటింగ్‌ సిస్టం పనిచేసేలా చర్యలు తీసుకున్నారు. ప్రజలకు ఇబ్బందులు కలగకుండా చూస్తామని మున్సిపల్‌ కమిషనర్‌ శ్రీనివాసన్‌ తెలిపారు. దీపాలు వెలగడంతో స్థానికులు హర్షం వ్యక్తం చేశారు.