ఇద్దరు చిన్నారులపై కుక్కల దాడి

గాయపడిన బాలుడు హేమంత్‌

బాలాపూర్‌, న్యూస్‌టుడే: ఒకే కుటుంబానికి చెందిన ఇద్దరు చిన్నారులపై వీధి కుక్కలు దాడి చేసిన సంఘటన గుర్రంగూడలో చోటుచేసుకుంది. నాగర్‌కర్నూల్‌కు చెందిన పర్వతాలు, శారద భార్యాభర్తలు. వీరు ఇద్దరు కుమార్తెలు, కుమారుడితో కలిసి బడంగ్‌పేట కార్పొరేషన్‌ గుర్రంగూడ టీచర్స్‌ కాలనీలోని ఓ అపార్టుమెంట్‌లో వాచ్‌మెన్‌గా ఉంటున్నారు. శుక్రవారం రెండో కుమార్తె సింధు సెల్లార్‌లో ఆడుకుంటుండగా కుక్కలు లోపలికి వచ్చి దాడి చేయగా వీపుపై గాయాలయ్యాయి. శనివారం కుమారుడు హేమంత్‌(5) కిరాణా దుకాణానికి వెళ్తుండగా అటుగా వచ్చిన వీధి కుక్క ఒక్కసారిగా అతనిపై దాడి చేసింది. స్థానికులు దానిని తరిమికొట్టారు. అప్పటికే బాలుడి చెవికి, తల, వీపు భాగాల్లో తీవ్ర గాయాలయ్యాయి. వెంటనే అసుపత్రికి తరలించి చికిత్స చేయించారు.