అగ్నిప్రమాదం పొంచి ఉన్న 23 భవనాలకు శ్రీముఖాలు

ఈనాడు, హైదరాబాద్‌: వరుస అగ్ని ప్రమాదాలతో జీహెచ్‌ఎంసీ రంగంలోకి దిగింది. ముమ్మర తనిఖీలతో  ముప్పు ఉన్న భవనాలను గుర్తిస్తూ.. వాటికి నోటీసులు జారీ చేస్తూ.. గడువులోపు చక్కదిద్దుకోవాలని ఎన్‌ఫోర్స్‌మెంట్‌ అధికారులు హెచ్చరిస్తున్నారు. స్పందించకపోతే ప్రాంగణాన్ని మూసేస్తామని, తలుపులకు తాళం వేస్తామని స్పష్టం చేస్తున్నారు. ఇందులో భాగంగా రద్దీ ప్రాంతాల్లోని 23 వాణిజ్య భవనాలకు మొదటి నోటీసులు ఇచ్చినట్లు బల్దియా ఎన్‌ఫోర్స్‌మెంట్‌ డైరెక్టర్‌ ప్రకాశ్‌రెడ్డి శనివారం ప్రకటనలో తెలిపారు. ఆయా భవనాలకు మూడ్రోజుల గడువు ఇచ్చామని, స్పందించకపోతే కఠిన చర్యలు తప్పవని పేర్కొన్నారు. రద్దీ ప్రాంతాల్లో నిత్యం వందలాది మంది వినియోగదారులను ఆకర్షించే వ్యాపార సముదాయాలను ఎంపిక చేసుకుని, వాటిలో అగ్నిమాపక వ్యవస్థ ఏమేర పని చేస్తోంది, అసలు ఉందా, లేదా అనే అంశాలను పరిశీలిస్తున్నామని జీహెచ్‌ఎంసీ చెబుతోంది. నిర్లక్ష్యం కనిపిస్తే అక్కడికక్కడే మొదటి నోటీసు ఇస్తున్నామని, దానికి మూడ్రోజుల్లో సమాధానం ఇవ్వకపోతే వ్యాపార సముదాయాన్ని సీజ్‌ చేస్తామని అధికారులు వెల్లడించారు.