పైలెట్‌నని నమ్మించి.. ఉద్యోగం ఇప్పిస్తానని మోసం

జూబ్లీహిల్స్‌, న్యూస్‌టుడే: పైలెట్‌నని నమ్మించి ఫ్లైట్‌ అటెండెంట్‌ ఉద్యోగం ఇప్పిస్తానంటూ మహిళను మోసం చేసిన ఘటన బంజారాహిల్స్‌ ఠాణా పరిధిలో చోటుచేసుకొంది. పోలీసులు తెలిపిన వివరాల ప్రకారం.. శ్రీనగర్‌కాలనీలో నివసించే సీఆర్‌పీఎఫ్‌ ఉద్యోగి భార్య భారతి ఉద్యోగం కోసం చూస్తుండగా, ప్రవీణ్‌కుమార్‌ అనే వ్యక్తి పరిచయమయ్యాడు. తాను పైలెట్‌నని, ఫ్లైట్‌ అటెండెంట్‌ ఉద్యోగం ఇప్పిస్తానని నమ్మించాడు. ఈ క్రమంలోనే తనకు తక్కువ ధరకు బంగారం వస్తుందని తులం కేవలం రూ. 35వేలు ఉంటుందని చెప్పాడు. కొంత డబ్బులు ఇస్తే తిరిగి కొద్ది రోజుల్లో ఇస్తానంటూ చెప్పడంతో, ఆమె తన తాళిబొట్టు, ఇతర బంగారు ఆభరణాలు తాకట్టుపెట్టి రూ.2.25లక్షలు ఇచ్చింది. అనంతరం డబ్బులు తిరిగి ఇవ్వకపోగా, ఉద్యోగం చూపించలేదు. అతడిని నిలదీయగా బెదిరింపులకు దిగడంతో శనివారం ఆమె పోలీసులకు ఫిర్యాదు చేశారు. ఈమేరకు కేసు నమోదు చేసి దర్యాప్తు చేస్తున్నారు.