పబ్‌లో వ్యాపారిపై దాడి

జూబ్లీహిల్స్‌, న్యూస్‌టుడే: బంజారాహిల్స్‌లోని పబ్‌కు వెళ్లిన ఓ వ్యాపారిపై కొందరు వ్యక్తులు అకారణంగా దాడికి పాల్పడ్డారు. బంజారాహిల్స్‌ పోలీసులు తెలిపిన వివరాల ప్రకారం.. మేడ్చల్‌ జిల్లా కేశవ మండలం గోధుమకుంట గ్రామానికి చెందిన వ్యాపారి హరీశ్‌రెడ్డి శనివారం రాత్రి బంజారాహిల్స్‌ రోడ్‌ నంబరు 14లోని ఛీర్స్‌ పబ్‌కు వెళ్లారు. రాత్రి 11.35 గంటల ప్రాంతంలో మద్యం తాగుతుండగా, అకస్మాత్తుగా వెనుక నుంచి వచ్చిన వ్యక్తి అకారణంగా గొడవకు దిగి చేయి చేసుకున్నాడు. అనంతరం తన స్నేహితులు పది మందిని పిలవగా, అందరూ కలిసి దాడి చేశారు. దీంతో హరీశ్‌రెడ్డి తీవ్రంగా గాయపడ్డారు. ఆయనకు చెందిన 30 గ్రాముల బంగారు గొలుసు మాయమైంది. బాధితుడి ఫిర్యాదు మేరకు పోలీసులు కేసు నమోదుచేసి దర్యాప్తు చేస్తున్నారు.