శివార్లలో వారాంతం మందు.. విందు..

పోలీసుల అదుపులో నిందితులు

ఈనాడు- హైదరాబాద్‌: వారాంతంలో వ్యభిచారం, గంజాయి, హుక్కా, మద్యంతో ఎరవేస్తూ అందినకాడికి నగరం శివారుల్లోని కొన్ని హోటళ్లు, ఫాంహౌస్‌లు, రిసార్టులు దండుకుంటున్నాయి. తాజాగా సైబరాబాద్‌ ఎస్‌వోటీ పోలీసుల దాడులతో ఈ దందా మరోసారి బట్టబయలైంది. కమిషనరేట్‌ పరిధిలోని 8 లాడ్జీలు, 11 ఫాంహౌస్‌లు, ఆరు పబ్బులు, 14 దాబాల్లో తనిఖీలు నిర్వహించినట్లు సైబరాబాద్‌ ఎస్‌వోటీ డీసీపీ రషీద్‌ తెలిపారు. వారాంతపు తనిఖీల్లో మొత్తం 44 మంది పట్టుబడినట్లు ఆదివారం ఓ ప్రకటనలో వివరించారు. ఐదుగురు బాధిత యువతులకు సంరక్షణ కేంద్రానికి తరలించారు. 100 గ్రాముల గంజాయి, హుక్కా సామగ్రి, 47 ఫోన్లు, 9వాహనాలు, రూ.1,400 నగదు, మద్యం స్వాధీనం చేసుకున్నారు.

తనిఖీల్లో ఉల్లంఘనలివీ..

* పేట్‌బషీరాబాద్‌ ఠాణా పరిధిలోని లక్ష్మీ విల్లా గెస్ట్‌హౌస్‌లో గంజాయి లభ్యమైంది. వినియోగదారులు సిగరెట్లలో గంజాయి నింపి తీసుకుంటున్నారు. తనిఖీలు చేసి 8 మందిని అరెస్టు చేశారు.

* కేపీహెచ్‌బీ హోటల్‌ కార్తికేయ రెసిడెన్సీలో వ్యభిచారం జరుగుతోంది. నిర్వాహకులు రాజు, నరేశ్‌ పరారీలో ఉన్నారు.

* శామీర్‌పేట జాస్మిన్‌ ఫాంహౌస్‌లో గంజాయి తీసుకుంటూ 10 మంది చిక్కారు. ఫాంహౌస్‌ యజమాని ముస్తఫా అలీ పరారీలో ఉన్నాడు.

* శంషాబాద్‌ అక్రియేషన్‌ ఫాంహౌస్‌లో హుక్కా, మద్యం పట్టుబడింది. పార్టీ నిర్వాహకుడిని అరెస్టు చేశారు.

* మెయినాబాద్‌ బ్రౌన్‌టౌన్‌ రిసార్టు మ్యాంగో ఉడ్‌ఫామ్‌లో ముజ్రా పార్టీ నిర్వహిస్తున్నారు. వ్యభిచారం జరుగుతోంది. 15 మందిని అరెస్టు చేశారు. కుషీ కర్తే మ్యాంగో ఉడ్‌ పామ్‌లో హుక్కా, మద్యం లభ్యమైంది. ఎనిమిది మందిని అదుపులోకి తీసుకున్నారు. విల్లాల యజమానులు పరారీలో ఉన్నారు.