ప్రేమ విఫలం, అప్పుల బాధ.. యువకుడి ఆత్మహత్య

నాంపల్లి, న్యూస్‌టుడే: ఓ వైపు ప్రేమ విఫలమవడం.. మరోవైపు ఆర్థిక ఇబ్బందులు చుట్టుముట్టడంతో ఓ యువకుడు బలవన్మరణానికి పాల్పడ్డాడు. నాంపల్లి ఇన్‌స్పెక్టర్‌ రాజునాయక్‌, ఎస్సై ఎస్‌.బ్రహ్మచారి కథనం ప్రకారం.. కరీంనగర్‌ జిల్లా కోరుట్ల గ్రామానికి చెందిన మోటూరి సాయిప్రసాద్‌ (24) ఊర్లో ఓ యువతిని ప్రేమించగా.. ఆ ప్రేమ విఫలమైంది. మరోవైపు అందినకాడికి అప్పులు చేశాడు. అప్పులిచ్చినవారి నుంచి ఒత్తిడి పెరగడంతో కొంతకాలం క్రితమే నగరానికి వలస వచ్చి నాంపల్లి రెడ్‌హిల్స్‌లోని ఆండాళమ్మ బస్తీలో అద్దె ఇంట్లో నివాసం ఉంటున్నాడు. అబిడ్స్‌లోని ఓ హాస్టల్‌లో వంట మనిషిగా పనిచేస్తున్నాడు. హాస్టల్‌లో డ్యూటీకి వెళ్లకపోవడంతో ఆదివారం సాయంత్రం నిర్వాహకులు వచ్చి చూడగా.. అప్పటికే ఉరేసుకొని విగతజీవిగా కనిపించాడు. పోలీసులు కుటుంబ సభ్యులకు సమాచారమిచ్చారు. సోమవారం ఉస్మానియా మార్చురీలో మరణోత్తర పరీక్ష అనంతరం మృతదేహాన్ని కుటుంబీకులకు అప్పగించారు. కేసు నమోదు చేసుకుని దర్యాప్తు చేస్తున్నారు.