రూ.752.79 కోట్లతో ఓయూ బడ్జెట్‌

బడ్జెట్‌ ప్రవేశపెడుతున్న ప్రొ.ఆర్‌.నాగేశ్వర్‌రావు

ఉస్మానియా యూనివర్సిటీ, న్యూస్‌టుడే: ఉస్మానియా యూనివర్సిటీ 2023-24 ఆర్థిక సంవత్సరానికి వార్షిక బడ్జెట్‌ను సోమవారం ప్రవేశపెట్టారు. ఓయూ మొత్తం ఆదాయం రూ.685.79 కోట్లు, గతేడాది ఓపెనింగ్‌ బ్యాలెన్స్‌ రూ.24.36 కోట్లు.. వ్యయం రూ.752.79 కోట్లు, లోటు రూ.42.64 కోట్లుగా చూపారు. ప్రభుత్వం ఇచ్చే బ్లాక్‌ గ్రాంట్‌ రూ.457.10 కోట్లు, మిగిలిన నిధులను యూనివర్సిటీ అంతర్గతంగా సమకూర్చుకోనుంది. ఓయూ పరిపాలనా భవనంలోని సెనేట్‌ హాల్‌లో ఉపకులపతి ప్రొ.రవీందర్‌ అధ్యక్షతన జరిగిన సమావేశంలో ప్రొ.మురళీకృష్ణ వార్షిక నివేదికను చదివి వినిపించారు. అనంతరం మేనేజ్‌మెంట్‌ విభాగానికి చెందిన ప్రొ.ఆర్‌.నాగేశ్వర్‌రావు ఉస్మానియా యూనివర్సిటీ 2023-24 బడ్జెట్‌ను ప్రవేశ పెట్టారు.  

రూపాయి రాక.. బడ్జెట్‌ మొత్తం రూ.752.79 కోట్లలో లోటు 5.66శాతం (రూ.42.64 కోట్లు). ప్రభుత్వ బ్లాక్‌ గ్రాంట్‌ 60.72శాతం (రూ.457.10 కోట్లు). గతేడాది ఓపెనింగ్‌ బ్యాలెన్స్‌ 3.23శాతం (రూ.24.36 కోట్లు). వివిధ గ్రాంట్ల రూపేణా ప్రభుత్వం నుంచి 7.30 శాతం (రూ. 55.00 కోటు)్ల మంజూరైంది. మిగిలిన 23.07శాతం (రూ.173.69 కోట్ల) నిధులను యూనివర్సిటీ భరించాల్సిఉంది. ఇందులో అంతర్గత ఆదాయాల ద్వారా రూ.36.45 కోట్లు, ఎగ్జామినేషన్‌ బ్రాంచ్‌, ఫారన్‌ రిలేషన్స్‌ ఆఫీస్‌, పీజీఆర్‌ఆర్‌సీడీఈ తదితరాల ద్వారా రూ.134.54 కోట్లు, వివిధ రకాల రుణాలు, అవార్డుల వసూళ్లు వాటి ద్వారా రూ.2.70 కోట్లు సమకూర్చుకుంటామని తెలిపారు. మొత్తం బడ్జెట్‌లో ఉద్యోగుల జీతాలు, పెన్షన్లకు దాదాపు 94.23 శాతం నిధులు కేటాయించారు.

రూపాయి పోక.. మొత్తం రూ.752.79 కోట్ల యూనివర్సిటీ మొత్తం బడ్జెట్‌లో ఉద్యోగుల వేతనాలకు 55.31 శాతం (రూ.416.33 కోట్లు), పెన్షన్లకు 38.92 శాతం (రూ. 293.00కోట్లు) కేటాయించారు. కాంటింజెన్సీకి 5.41శాతం (రూ.40.76కోట్లు), ఉద్యోగుల లోన్లకు 0.36శాతం (రూ.2.70కోట్లు) కేటాయించారు.

ప్రభుత్వం సహకరిస్తోంది..
- ప్రొ.రవీందర్‌, ఓయూ ఉపకులపతి

ఉస్మానియా యూనివర్సిటీ ఈ ఆర్థిక సంవత్సరం బడ్జెట్‌లో లోటు రూ.42.64 కోట్లుగా ఉంది. ప్రభుత్వం సహకరించాలని విజ్ఞప్తి చేశాం. యూనివర్సిటీని ఆర్థికంగా ఆదుకోవాలని ప్రభుత్వాన్ని కోరతాం.