చూసొద్దాం.. సీతాకోకల వనం

కేపీహెచ్‌బీ ఐదో ఫేజ్‌లో సీతాకోక చిలుకల ఉద్యానం సిద్ధమైంది. నగరవ్యాప్తంగా రూ.123కోట్లతో చేపట్టిన 57 థీమ్‌ పార్కుల అభివృద్ధిలో భాగంగా ఈ పార్కును ఏర్పాటు చేసినట్లు కూకట్‌పల్లి జోనల్‌ కమిషనర్‌ వి.మమత సోమవారం ట్విట్టర్‌లో పేర్కొన్నారు. ఉద్యానంలో సీతాకోక చిలుకల రంగు బొమ్మలు, కుర్చీలపై వేసిన చిత్రాలను ఆమె ట్విట్టర్‌లో ఉంచారు. ఉద్యానాన్ని 560చ.మీ విస్తీర్ణంలో రూ.10.81లక్షలతో అభివృద్ధి చేశారు. పార్కు చుట్టూ విశాలమైన ఖాళీ ప్రదేశం, అడవి వాతావరణం ఉంటుంది. సీతాకోకచిలుకలకు ఇష్టమైన ఇగ్జోరా, లావెండర్‌, చైనాబాక్స్‌, వింకారోజియా, లాంటేనా కెమెరా (పులికంప), టెకిమా కెపిన్సిస్‌, కదంబ, పైసోవియా ఆల్బా, గోవర్దనగిరి, పైకాస్‌మాల్టిహెడ్‌ వంటి మొక్కలను పార్కులో నాటారు. కుర్చీలు, సెల్ఫీ స్పాట్‌ను, ఇతర సౌకర్యాలను అందుబాటులోకి తెచ్చారు.

ఈనాడు, హైదరాబాద్‌