దుంప పంటల సాగుకు నేలలు అనుకూలం

కొత్త రకం మొరం గడ్డ మొలకలతో మహిళా రైతులు

వికారాబాద్‌ మున్సిపాలిటీ, న్యూస్‌టుడే: చేమగడ్డ, మొరంగడ్డ సాగుకు ఈ ప్రాంత నేలలు ఎంతో అనుకూలంగా ఉన్నాయని కొండా లక్ష్మణ్‌ ఉద్యాన విశ్వవిద్యాలయం కూరగాయల పరిశోధన స్థానం శాస్త్రవేత్త డాక్టర్‌ సురేశ్‌ అన్నారు. మంగళవారం వికారాబాద్‌ మండలం ఎర్రవల్లి గ్రామంలో ఉద్యాన విశ్వవిద్యాలయం, పట్టు పరిశ్రమ శాఖ, ఎస్సీ సబ్‌ప్లాన్‌ కింద మహిళా రైతులకు దుంప పంటలపై ఒకరోజు అవగాహన కార్యక్రమాన్ని నిర్వహించారు. ఈ సందర్భంగా ఏర్పాటు చేసిన సమావేశంలో ఆయన మాట్లాడుతూ దుంపల సాగుకు అత్వెల్లి, కొంపల్లి, మదన్‌పల్లి, ఎర్రవల్లి, పులుమద్ది గ్రామ భూములు అనుకూలంగా ఉన్నాయని వివరించారు. వరికి ప్రత్యామ్నాయంగా దుంప పంటల సాగు లాభదాయకంగా ఉంటుందన్నారు. మరో శాస్త్రవేత్త లావణ్య మాట్లాడుతూ దుంపలకు మార్కెట్‌లో సరియైన ధర లేనప్పుడు చిప్స్‌, పిండి పదార్థాలను తయారు చేయవచ్చని సూచించారు. అనంతరం శాస్త్రవేత్తలు రూపొందించిన కొత్త రకం చేమగడ్డ విత్తనాలు, మొరంగడ్డ మొలకలను పంపిణీ చేశారు. ఉద్యాన అధికారులు కమల, వైజయంతి, అర్చన, నర్సింహారెడ్డి, తదితరులు పాల్గొన్నారు.