ఆక్రమణలపై ఉక్కుపాదం

ఆపరేషన్‌ శంషాబాద్‌ విజయవంతం

పొక్లెయిన్‌తో నిర్మాణాల ధ్వంసం

శంషాబాద్‌, న్యూస్‌టుడే: నకిలీ భూ దస్త్రాలు సృష్టించి హెచ్‌ఎండీఏ స్థలాలను కాజేయడానికి రియల్‌ వ్యాపారులు వేసిన ఎత్తుగడలను ఉన్నతాధికారులు చిత్తు చేశారు. హెచ్‌ఎండీఏ, రెవెన్యూ అధికారులు తెలిపిన వివరాల ప్రకారం.. శంషాబాద్‌లో జాతీయ రహదారికి ఆనుకొని హెచ్‌ఎండీఏకు చెందిన 50 ఎకరాలపై కొంత మంది రియల్‌ వ్యాపారుల కన్నుపడింది. నకిలీ భూ దస్త్రాలు సృష్టించి దాన్ని కబ్జా చేసి అక్రమ నిర్మాణాలకు తెరలేపారు. ఈ వ్యవహారం హెచ్‌ఎండీఏ ఉన్నతాధికారుల దృష్టికి వెళ్లడంతో మంగళవారం ఉదయం సీపీ స్టీఫెన్‌ రవీంద్ర ఆధ్వర్యంలో పోలీసులు బెంగళూర్‌ జాతీయ రహదారి- ఔటర్‌ సర్వీస్‌ రోడ్డుకు అనుసంధానంగా ఉన్న రహదారులను 5 గంటల పాటు పూర్తిగా మూసివేశారు. తెల్లవారుజామున 3 గంటల నుంచి ఉదయం 8 గంటల వరకు 6 యంత్రాలతో అక్రమ నిర్మాణాలను కూల్చివేశారు. ఈ ఆపరేషన్‌లో 15 మంది హెచ్‌ఎండీఏ ఎస్టేట్‌ అధికారులు, సిబ్బంది.. 50 మంది ఎన్‌ఫోర్స్‌మెంట్‌ భద్రతాసిబ్బంది, 20 మంది సైబరాబాద్‌ పోలీసులు, 10 మంది క్షేత్రస్థాయి సిబ్బంది పాల్గొన్నారు.