పర్యావరణ పరిరక్షణకు విదేశీ వర్సిటీతో జేఎన్‌టీయూ ఒప్పందం

వాటర్‌ సెంటర్‌ ఏర్పాటుపై రజత్‌కుమార్‌తో చర్చలు

రాష్ట్ర అధికారులు రజత్‌కుమార్‌, మురళీకృష్ణ, జేఎన్‌టీయూ ప్రొ. విజయలక్ష్మితో వెస్ట్రన్‌ సిడ్నీ వర్సిటీ ప్రతినిధులు లిండా టేలర్‌, జోడీ మెక్‌ కే

ఈనాడు, హైదరాబాద్‌, న్యూస్‌టుడే, కూకట్‌పల్లి: పర్యావరణ పరిరక్షణ, శాస్త్ర సాంకేతిక పరిజ్ఞానంపై జేఎన్‌టీయూ హైదరాబాద్‌, ఆస్ట్రేలియాకు చెందిన వెస్ట్రన్‌ సిడ్నీ యూనివర్సిటీతో ఒప్పందం కుదుర్చుకుంది. జేఎన్‌టీయూ వీసీ కట్టా నర్సింహారెడ్డి, సిడ్నీ వర్సిటీ డిప్యూటీ వీసీ దెబొరా స్వీనేలు మంగళవారం ఒప్పంద పత్రాలపై సంతకాలు చేశారు. దీని ప్రకారం రెండు వర్సిటీలు ఎన్విరాన్‌మెంట్‌ సైన్స్‌ అండ్‌ టెక్నాలజీతో పీహెచ్‌డీ ప్రోగ్రాం నిర్వహిస్తాయి. అనంతరం వెస్ట్రన్‌ సిడ్నీ యూనివర్సిటీ ప్రతినిధులు, జేఎన్‌టీయూ సెంటర్‌ ఫర్‌ ఎన్విరాన్‌మెంట్‌ సంచాలకులు డాక్టర్‌ టి.విజయలక్ష్మి తదితరులు సాగునీటి పారుదల శాఖ ప్రత్యేక ప్రధాన కార్యదర్శి రజత్‌కుమార్‌ను కలిసి ఆస్ట్రేలియా ఇండియా వాటర్‌ సెంటర్‌(ఏఐడబ్ల్యూసీ) ఏర్పాటుపై చర్చలు జరిపారు. ఇందులో భాగంగా సాగునీటి ప్రాజెక్టుల్లోని ఇంజినీర్లకు వెస్ట్రన్‌ యూనివర్సిటీ ప్రొఫెసర్లు శిక్షణ ఇస్తారు. ఈ కేంద్రం ఏర్పాటుపై ప్రభుత్వానికి ప్రతిపాదనలు పంపుతామని, అంగీకారం రాగానే ఏర్పాటుచేస్తామని రజత్‌కుమార్‌ తెలిపారు. జేఎన్‌టీయూ రెక్టార్‌ గోవర్ధన్‌, రిజిస్ట్రార్‌ మంజూర్‌ హుస్సేన్‌, డీఏపీ డైరెక్టర్‌ చంద్రమోహన్‌, ఆర్‌అండ్‌డీ డైరెక్టర్‌ విజయ్‌కుమార్‌రెడ్డి, ప్రవేశాల విభాగం డైరెక్టర్‌ వెంకటరామిరెడ్డి, ప్రిన్సిపల్‌ జయలక్ష్మి, డీఏపీ డిప్యూటీ డైరెక్టర్‌ శ్వేత, లిండా టేలర్‌, ఆస్ట్రేలియా ప్రభుత్వ మాజీ మంత్రి జోడీ మెక్‌ కే పాల్గొన్నారు.