గుప్త నిధుల కోసం తవ్వకాలు

తొమ్మిది మంది అరెస్టు

రాజేంద్రనగర్‌, న్యూస్‌టుడే: గుప్త నిధుల కోసం ఓ ఇంట్లో తవ్వకాలు జరుపుతున్న 9 మందిని రాజేంద్రనగర్‌ పోలీసులు అరెస్టు చేశారు. ఎస్సై ఇంద్రసేనారెడ్డి తెలిపిన వివరాల మేరకు.... మొయినాబాద్‌ మండలం హిమాయత్‌నగర్‌కు చెందిన వినోద్‌(32) రాజేంద్రనగర్‌ సర్కిల్‌ బుద్వేల్లో నివసించే తన తాత అయిన విశ్రాంత ఉద్యోగి నాగులుయాదవ్‌ ఇంటికి వచ్చాడు. నాగులు యాదవ్‌ ఇల్లు బుద్వేల్లోని ఓ పురాతన కోటగోడకు ఆనుకుని ఉండటంతో ఆ ఇంట్లో గుప్త నిధులు ఉన్నాయని వినోద్‌ భావించాడు.  ఆదివారం రాత్రి ఇంట్లో తవ్వకాలు ప్రారంభించారు. గమనించిన చుట్టుపక్కల వారు పోలీసులకు సమాచారం ఇవ్వగా వారు చేరుకొని తవ్వకాలు జరిపిస్తున్న వినోద్‌తో పాటు మొయినాబాద్‌కు చెందిన విశ్వంత్‌, హరిప్రీత్‌సింగ్‌, శివసాయి, బషీర్‌బాగ్‌కు చెందిన అస్లం, దోమలగూడకు చెందిన దివ్యానా, ఫలక్‌నుమాకు చెందిన ఖాదర్‌ఖాన్‌, మురళీకృష్ణ, ఎర్రమంజిల్‌కు చెందిన కృష్ణమోహన్‌ తదితరులను అరెస్టు చేసినట్లు ఎస్సై తెలిపారు.