మళ్లీ కబ్జా.. మైసమ్మ చెరువు మాయమిక!

మైసమ్మచెరువు దోభీఘాట్‌ వెనుక చెరువును మట్టితో పూడ్చిన దృశ్యం

ఈనాడు, హైదరాబాద్‌: మూసాపేట గ్రామ పరిధిలోని మైసమ్మ చెరువును కబ్జాదారులు ముంచేస్తున్నారు. గతంలో నకిలీ సమాధులను నిర్మించి కబ్జాకు యత్నించిన ఉదంతంపై ‘ఈనాడు’ కథనాన్ని ప్రచురించగా.. జీహెచ్‌ఎంసీ అధికారులు వాటిని తొలగించి ఆక్రమణ అడ్డుకున్నారు. కొన్ని రోజులు మౌనంగా ఉన్న ఆక్రమణదారు తాజాగా మళ్లీ కబ్జా పర్వాన్ని ప్రారంభించారు. శ్మశానవాటిక పక్కనున్న భూమితోపాటు.. దోభీఘాట్‌ వెనుకనున్న ఎఫ్‌టీఎల్‌(పూర్తిస్థాయి నీటి మట్టం) స్థలానికీ ఎసరు పెట్టారు. మూసాపేట ఐడీఎల్‌ భూముల పక్కన భారీ భవంతుల నిర్మాణ పనులు జరుగుతుండగా, అక్కడ ఉత్పత్తవుతున్న సెల్లారు మట్టి, బండరాళ్లను చెరువు కబ్జాకు వినియోగిస్తున్నారు. రాత్రిళ్లు భారీ ట్రక్కులతో టన్నుల కొద్దీ మట్టిని చెరువులో వేస్తున్నారు. మంత్రి కేటీఆర్‌ చెరువుల సంరక్షణకు అనేక రకాల చర్యలు తీసుకుంటుండగా, మంత్రి లక్ష్యానికి గండికొట్టేలా ఆక్రమణదారు మైసమ్మ చెరువును మాయం చేస్తున్నారు. స్థానిక ప్రజాప్రతినిధి దన్ను ఉండటంతో, కబ్జాను అడ్డుకునేందుకు యత్నించే అధికారులపై ఆక్రమణదారు బెదిరింపులకు పాల్పడుతుండటం గమనార్హం.