మహిళా మహోత్సవాలకు విశేష స్పందన

రామోజీ ఫిల్మ్‌సిటీలో సందడి

ఫిల్మ్‌సిటీలో వినోద కార్యక్రమాన్ని తిలకిస్తున్న పర్యాటకులు

రామోజీ ఫిల్మ్‌సిటీ, న్యూస్‌టుడే : మహిళా మహోత్సవాల సందర్భంగా రామోజీ ఫిల్మ్‌సిటీలో నిర్వహిస్తున్న ప్రత్యేక కార్యక్రమాలకు విశేష స్పందన లభిస్తోంది. మార్చి 1 నుంచి 31 వరకు ఏర్పాటుచేసిన మహిళా మాసోత్సవాల్లో అన్ని వర్గాల మహిళలు ఉత్సాహంగా పాల్గొంటున్నారు. హైదరాబాద్‌తో పాటు దేశంలోని ఇతర ప్రాంతాల నుంచీ మహిళలు భారీగా తరలివచ్చి వేడుకల్లో పాల్గొంటున్నారు. స్టూడియో టూర్‌, ప్రత్యేక ప్రదర్శనలు, స్టంట్‌ షోలు, సరదా రైడ్‌లు, పక్షుల పార్కు, సీతాకోక చిలుకల పార్కు సందర్శన, ఉద్యానాల్లో విహారంతో అద్వితీయ అనుభూతి పొందుతున్నారు. ప్రత్యేక వినోద కార్యక్రమాలను వీక్షిస్తూ, రామోజీ అడ్వెంచర్‌ సాహస్‌లోని కార్యకలాపాల్లో భాగస్వాములవుతున్నారు. టాలెంట్‌ హంట్‌ నిర్వహించి విజేతలకు బహుమతులు అందిస్తుండటంతో మహిళలు ఉత్సాహంగా పాల్గొంటున్నారు. రామోజీ ఫిల్మ్‌సిటీ ప్రత్యేక ఆఫర్‌లో భాగంగా అడ్వాన్స్‌ బుకింగ్‌ ఆన్‌లైన్‌ ద్వారా ప్రవేశ టికెట్‌ను కొనుగోలు చేస్తే ఇద్దరు మహిళలకు ప్రవేశం కల్పించడంతో మంచి ఆదరణ లభించింది. 31వ తేదీ వరకు వేడుకల్లో పాల్గొనడానికి అవకాశం ఉంది.