అసంపూర్తి పనులు.. తప్పని అవస్థలు

తాండూరు టౌన్‌ (న్యూస్‌టుడే): ఇంటింటికీ తాగు నీటిని అందించాలనే ఉద్దేశంతో రాష్ట్ర ప్రభుత్వం చేపట్టిన మిషన్‌ భగీరథ మొదటి దశ పనులు తాండూరులో ఆశించిన స్థాయిలో ముందుకు సాగటం లేదు. అసంపూర్తి పనులతో నీరంతా వృథా కావటంతోపాటు, ప్రజలు ఇబ్బందులు పడుతున్నారు. ఇది వరకే ఏర్పాటు చేసిన పైపులకు నల్లాలు బిగించటంలో  జాప్యం చేస్తున్నారు. పట్టణ వాసులకు ఏళ్ల నుంచి తాగు నీటిని అందిస్తున్న కాగ్నా నది ఒడ్డున ఉన్న పాత, కొత్త పంప్‌హౌస్‌లు పని చేయటం లేదు. విద్యుత్‌ మోటార్లు నిరుపయోగంగా పడి ఉన్నాయి. పట్టణంలోని ఆయా వార్డుల్లో పనులు ఇష్టానుసారం కొనసాగుతున్నాయి. మొత్తం 150 కిలోమీటర్ల పైపుల ఏర్పాటుకు, 112 కిలోమీటర్లు పూర్తి చేశారు. పైపులకు ఇంకా అనుసంధానం చేయాల్సి ఉంది. 12 వేల కనెక్షన్లకు 8,500 మాత్రమే ఇచ్చారు. ఇప్పటికైనా పనులు త్వరితగతిన పూర్తి చేయాలని పట్టణ ప్రజలు కోరుతున్నారు.