మూగ గోస చికిత్సతో భరోసా

పశు వైద్యశాలల్లో అత్యాధునిక వైద్యం
పట్టణ, గ్రామీణ ప్రాంతాల్లో సౌకర్యాలు

ఈనాడు, హైదరాబాద్‌, న్యూస్‌టుడే, రాజేంద్రనగర్‌, చేవెళ్ల గ్రామీణం: జంతువుల హృదయ స్పందన తెలుసుకునేందుకు.. ఆరోగ్య పరిస్థితులను పర్యవేక్షించేందుకు రాష్ట్ర ప్రభుత్వం ప్రత్యేక దృష్టి కేంద్రీకరించింది. రంగారెడ్డి.. మేడ్చల్‌ జిల్లాల్లోని గ్రామీణ ప్రాంతాల్లోని పశువైద్యశాలలు, రాజేంద్రనగర్‌లోని వెటర్నరీ కళాశాలలో ఆధునిక వైద్య పరికరాలతో అనుభవజ్ఞులైన వైద్యనిపుణులను నియమించారు. ఓపీ సేవలతో పాటు అత్యవసర వైద్యసేవలు, శస్త్రచికిత్సలు చేస్తున్నారు. రెండు జిల్లాల్లో 40వేల ఆవులు..గేదెలు, 70వేల మేకలు.. గొర్రెలు, 20వేల పెంపుడు జంతువులున్నాయి. వీటి అవసరాల కోసం ఆసుపత్రుల్లో సౌకర్యాలను అందుబాటులోకి తీసుకొస్తున్నామని పశుసంవర్ధకశాఖ వైద్యులు తెలిపారు.

కలుషిత ఆహారం.. ప్రమాదాలు..: రంగారెడ్డి.. మేడ్చల్‌ జిల్లాలోని మున్సిపల్‌ కార్పొరేషన్లు, మున్సిపాలిటీలు నగరానికి సమీపంగా ఉండటంతో హైదరాబాద్‌ తరహాలోనే రోడ్లపైనే ఆహారపదార్థాలు పారేయడంతో పాటు నీటివనరులు కలుషిత చేస్తున్నారు. గేదెలు, ఆవులు, పెంపుడు జంతువులు బయటకు వెళ్లినప్పుడు కలుషిత జలాలు తాగుతున్నాయి. రోడ్లపై పడేసిన ఆహారపదార్థాలు తింటున్నాయి. వీటిల్లో ప్లాస్టిక్‌ వ్యర్థాలుండటంతో  గుండె సంబంధ జబ్బులు..మూత్రపిండాల సమస్యలొస్తున్నాయి. వీటిని గుర్తించేందుకు కార్డియాలజీ, 2డీ ఎకో, డయాలసిస్‌ యంత్రాలు, ప్రమాదాల్లో గాయపడి ఎక్కువగా రక్తంపోతే రక్తమార్పిడికి బ్లడ్‌ ట్రాన్స్‌ఫ్యూజన్‌, ఈసీజీ, అల్ట్రాసౌండ్‌, అధునాతన ఎక్స్‌రే మిషన్‌, ఎండోస్కోపీ, వెంటిలేటర్‌, హెమటాలజీ ఎనలైజర్స్‌తో పాటు కొన్ని లోపాలతో జన్మించిన జంతువులకు ప్రత్యేకంగా ఇంక్యుబేటర్లను సిద్ధంగా ఉంచారు.

కార్పొరేట్‌ వైద్యానికి దీటుగా...: హైదరాబాద్‌ నగరంలోని కార్పొరేట్‌ పశు వైద్యశాలలకు దీటుగా రాజేంద్రనగర్‌ వెటర్నరీ కళాశాలలో సౌకర్యాలున్నాయి. ఇటీవలే రూ.40కోట్లతో ఆధునిక వైద్య పరికరాలు అందుబాటులోకి తెచ్చారు. దీంతోపాటు చేవెళ్ల, ఇబ్రహీంపట్నం, కందుకూరు డివిజన్ల పరిధుల్లో గేదెలు, ఆవులు, గొర్రెలు, పెంపుడు జంతువులకు సకాలంలో వైద్యం అందించేందుకు సౌకర్యాలు ఏర్పాటు చేశారు.