పెట్టుబడికి లాభాలంటూ రూ.4 కోట్లు మోసం

ఈనాడు- హైదరాబాద్‌: సైబర్‌ నేరగాళ్ల వలలో పడి ఓ సంస్థ యజమాని ఏకంగా రూ.4 కోట్లు పోగొట్టుకున్నాడు. సైబరాబాద్‌ సైబర్‌క్రైమ్‌ పోలీసుల వివరాల ప్రకారం.. నగరానికి చెందిన యువకుడు బీటెక్‌ పూర్తి చేసి.. ఓ సంస్థను ప్రారంభించాడు. కొద్దికాలంలో మంచి లాభాలు వచ్చాయి. ఇటీవల అతనికి సామాజిక మాధ్యమాల్లో ఓ సందేశం వచ్చింది. తక్కువ పెట్టుబడితో ఎక్కువ సంపాదించొచ్చని అందులో ఉంది. అది నమ్మి కొంత డబ్బు పంపించాడు. ప్రారంభంలో లాభాలు రావడంతో రెండు నెలల్లో దాదాపు రూ.4 కోట్లు పంపించాడు. కొన్ని రోజుల తర్వాత స్పందన లేకపోవడంతో  సైబర్‌క్రైమ్‌ పోలీసులకు ఫిర్యాదు చేశాడు.