ఉద్యోగం పోతుందనే బెంగతో సాఫ్ట్‌వేర్‌ ఉద్యోగి బలవన్మరణం

నార్సింగి, న్యూస్‌టుడే:  బెంగతో సాఫ్ట్‌వేర్‌ ఉద్యోగి ఆత్మహత్యకు పాల్పడ్డాడు. ఈ ఘటన రంగారెడ్డి జిల్లా మణికొండ పుర పరిధిలోని పుప్పాలగూడలో జరిగింది. నార్సింగి అడ్మిన్‌ ఎస్సై బాలరాజు వివరాల ప్రకారం.. గుంటూరుకు చెందిన వినోద్‌కుమార్‌(32)కు ఐదేళ్ల క్రితం పెళ్లయింది. భార్య, కుమార్తె(3) ఉన్నారు. గచ్చిబౌలిలోని వెరిజాన్‌ సంస్థలో పనిచేస్తున్నాడు. ఇప్పటి వరకు గుంటూరులోని ఇంటి నుంచి విధులు నిర్వహించిన ఆయన.. ఇటీవల హైదరాబాద్‌కు వచ్చి అల్కాపూర్‌ కాలనీ, రోడ్డు నెం.1లో ఉంటున్న సోదరుడు రాజేష్‌ ఇంట్లో ఉంటూ విధులకు వెళ్తున్నాడు. ఉద్యోగ భద్రతపై, కొత్త టూల్స్‌ నేర్చుకోవడం ఇబ్బందిగా ఉందంటూ తమ్ముడితో తరచూ చర్చించే వాడు. గురువారం మధ్యాహ్నం తమ్ముడు, మరదలు బయటికి వెళ్లగా వినోద్‌ గదిలో ఉరి వేసుకుని ఆత్మహత్యకు పాల్పడ్డాడు. కొంత సమయం తర్వాత ఇంటికి వచ్చిన సోదరుడు గమనించి సమీపంలోని ఆస్పత్రికి తీసుకెళ్లగా అప్పటికే మృతి చెందినట్లు వైద్యులు తెలిపారు.