బాలికపై వీధి కుక్కల దాడి

షాపూర్‌నగర్‌, న్యూస్‌టుడే: గాజులరామారం డివిజన్‌ పరిధి మల్లారెడ్డినగర్‌ సమీపంలోని చెన్నకేశవనగర్‌లో బాలికపై వీధి కుక్కలు దాడిచేశాయి. బాలిక గురువారం ఉదయం 7 గంటలకు సమీపంలోని కిరాణా దుకాణానికి వెళ్తుండగా నాలుగు శునకాలు ఒక్కసారిగా తనపై ఎగబడ్డాయి. దీంతో తీవ్ర గాయాలయ్యాయి. విషయం తెలుసుకొని బాలికను కుటుంబ సభ్యులు షాపూర్‌నగర్‌లోని ఓ ప్రైవేటు ఆసుపత్రిలో చేర్పించారు. లోతైన గాయాలు కావడంతో అధిక రక్తస్రావం జరిగిందని వైద్యులు తెలిపారు. చిన్నపిల్లలు, పెద్దవారు, వృద్ధులపై తరచూ శునకాలు దాడి చేస్తున్నప్పటికీ జీహెచ్‌ఎంసీ అధికారులు పట్టించుకోవడం లేదని స్థానికులు ఆగ్రహం వ్యక్తం చేస్తున్నారు. అధికారులు స్పందించి వాటిని తరలింపునకు చర్యలు తీసుకోవాలని కోరుతున్నారు.