విద్వేషాలు రెచ్చగొడితే కఠిన చర్యలు

అదనపు ఎస్పీ మురళీధర్‌

శాంతి సమావేశంలో మాట్లాడుతున్న మురళీధర్‌

తాండూరు టౌన్‌: పండుగల సమయాల్లో మత విద్వేషాలు రెచ్చగొడితే కఠిన చర్యలు తప్పవని అదనపు ఎస్పీ మురళీధర్‌ హెచ్చరించారు. రానున్న హనుమాన్‌ జయంతి, భద్రేశ్వర జాతర, రంజాన్‌ నేపథ్యంలో పట్టణంలో శనివారం శాంతి సమావేశం నిర్వహించారు. ఇందులో ఆయన పాల్గొని మాట్లాడారు. పండుగ సమయాల్లో అన్ని మతాలు, కులాల వారు ఐకమత్యంతో ఉండాలని చెప్పారు. ప్రశాంతంగా జరగటానికి కమిటీలు ఏర్పాటు చేస్తామన్నారు. సామాజిక మాధ]్యమాల్లో రెచ్చగొట్టే విధంగా సందేశాలు ప్రచారం చేయవద్దని చెప్పారు. కార్యక్రమంలో పురపాలక సంఘం అధ్యక్షురాలు తాటికొండ స్వప్న, ఉపాధ్యక్షురాలు పట్లోళ్ల దీప, గ్రంథాలయ సంస్థ జిల్లా అధ్యక్షుడు రాజుగౌడ్‌, హిందు ఉత్సవ సమితి ప్రధాన కార్యదర్శి నర్సింహులు, ముస్లిం సంక్షేమ సంఘం ప్రతినిధులు ఖుర్షిద్‌ హుస్సేన్‌, కమల్‌ అత్తర్‌, ఆయా పార్టీల రాజకీయ నాయకులు, డీఎస్పీ శేఖర్‌గౌడ్‌, పట్టణ సీఐ రాజేందర్‌రెడ్డి, గ్రామీణ సీఐ రాంబాబు పాల్గొన్నారు.