విచార యాత్ర

రైలు కిందపడి తల్లి మృతి
కుమారుడికి తప్పిన ప్రమాదం

కాచిగూడ, న్యూస్‌టుడే: రైలు ప్రమాద ఘటన నగర సందర్శనకు వచ్చిన ఓ కుటుంబంలో విషాదాన్ని నింపింది. నగరాన్ని తిలకించడానికి కేరళ నుంచి కుటుంబ సభ్యులు, బంధువులతో వచ్చిన గృహిణి ప్రమాదవశాత్తు రైలుకింద పడి చనిపోగా, ఆమె ఐదేళ్ల కుమారుడు ప్రాణాలతో బయటపడ్డాడు. కాచిగూడ రైల్వే పోలీస్‌స్టేషన్‌ పరిధిలో జరిగిన ఈ సంఘటన ఇన్‌స్పెక్టర్‌ శ్రీనివాస్‌రావు కథనం ప్రకారం.. కేరళ మలప్పురానికి చెందిన మహమ్మద్‌ నసీర్‌ దుబాయ్‌లో ఉంటున్నాడు. ఏడాదికోసారి ఇంటికి వచ్చినప్పుడు కుటుంబ సభ్యులతో కలిసి విహారయాత్రకు బయలుదేరుతాడు. దుబాయ్‌ నుంచి వచ్చిన అతను తన భార్య షకీరా(24), ఐదేళ్ల కుమారుడు, కుటుంబ సభ్యులు, బంధువులు 11 మందితో హైదరాబాద్‌ నగరాన్ని చూడడానికి బయలుదేరారు. గురువారం రాత్రి వారు తిరూర్‌ స్టేషన్లో మంగళూర్‌ ఎక్స్‌ప్రెస్‌ రైలు ఎక్కి కాచిగూడకు వస్తున్నారు. గురువారం అర్ధరాత్రి రైలు మలక్‌పేట స్టేషన్లో ఆగింది. అదే కాచిగూడ అనుకుని అంతా దిగారు. కాదని తెలుసుకుని అంతా రైలు ఎక్కారు. తన కుమారుడిని ఎత్తుకున్న షకీరా ఎక్కుతుండగా రైలు కదిలింది. ఆమె రైలు కింద పడిపోగా ఎడమ చెయ్యి తెగిపోయింది. ఆమెను ఉస్మానియా ఆసుపత్రికి తరలించగా అధిక రక్తస్రావంతో మృతిచెందింది. కుమారుడు గాయాలతో బయటపడ్డాడు.