Hyderabad: సెంట్రల్‌ హైదరాబాద్‌లో ఆకాశహర్మ్యాలు

నాంపల్లిలో నిర్మాణంలో ఉన్న పదంతస్తుల పార్కింగ్‌ సముదాయం ఎలివేషన్‌

ఈనాడు, హైదరాబాద్‌: పశ్చిమ హైదరాబాద్‌లో ఎక్కువగా కన్పించే ఆకాశహర్మ్యాల పోకడ సెంట్రల్‌ హైదరాబాద్‌కూ విస్తరిస్తోంది. ప్రధాన వ్యాపార కేంద్రంగా ఉన్న ఆబిడ్స్‌, చుట్టుపక్కల కొత్త నిర్మాణాలు ఒక్కొక్కటిగా వస్తున్నాయి.

* ఆబిడ్స్‌ ఎస్‌బీఐ బ్యాంకు ఎదురుగా దాదాపు ఎకరన్నర విస్తీర్ణంలో 40 అంతస్తుల్లో ఒక సంస్థ హైరైజ్‌ గృహ నిర్మాణ పనులను చేపట్టింది. ఇప్పటికే నాలుగైదు అంతస్తులు పూర్తయ్యాయి.

* మొజంజాహి మార్కెట్‌ సమీపంలో మరో సంస్థ 20 అంతస్తులతో గృహ నిర్మాణ ప్రాజెక్టులకు జీహెచ్‌ఎంసీ నుంచి అనుమతి పొందింది. 1.87 ఎకరాల ఎకరాల విస్తీర్ణంలో ఈ భవనం రాబోతుంది.

* ఇప్పటికే నాంపల్లిలో పదంతస్తుల్లో హైదరాబాద్‌ మెట్రోకు చెందిన బహుళ అంతస్తుల పార్కింగ్‌ సముదాయం నిర్మితమవుతోంది. పనులు పూర్తయితే ఎన్నికలకంటే ముందే ప్రారంభిస్తారు.

* ఆదర్శనగర్‌లో ప్రభుత్వం వేర్వేరు విభాగాల అధిపతుల కోసం జంట సౌధాలను నిర్మించే ప్రణాళికలో ఉంది.

* సెంట్రల్‌ హైదరాబాద్‌లో భాగమైన పంజాగుట్టలో ఓ భారీ వాణిజ్య భవనం పనులు ఇప్పటికే పూర్తికాగా గృహ నిర్మాణ ప్రాజెక్టు పనులు కొనసాగుతున్నాయి.

* బేగంపేటలోనూ ఒక హైరైజ్‌ వాణిజ్య నిర్మాణ పనులు ఇటీవల పూర్తయ్యాయి. ఇన్నాళ్లుగా ఖాళీగా ఉన్న స్థలాలను కొన్ని సంస్థలు కొనుగోలు చేసి వీటిని నిర్మిస్తున్నాయి.