గ్రూప్‌-1 పరీక్ష పకడ్బందీగా నిర్వహించాలి

మాట్లాడుతున్న అదనపు కలెక్టర్‌ రాహుల్‌శర్మ

వికారాబాద్‌, న్యూస్‌టుడే: ఈ నెల 11న ఉదయం 10:30 గంటల నుంచి ఒంటిగంట వరకు జరిగే గ్రూప్‌-1 పరీక్షను ఎలాంటి అవకతవకలు, పొరపాట్లకు తావివ్వకుండా పకడ్బందీగా నిర్వహించాలని జిల్లా అదనపు కలెక్టర్‌ రాహుల్‌శర్మ అధికారులను ఆదేశించారు. గురువారం కలెక్టర్‌ కార్యాలయంలోని సమావేశ మందిరంలో వివిధ శాఖల అధికారులతో పరీక్షల నిర్వహణపై సమీక్ష సమావేశం నిర్వహించారు. జిల్లాలోని 15 కేంద్రాల్లో 4,857 మంది అభ్యర్థులు పరీక్షలు రాయనున్నట్లు తెలిపారు. అభ్యర్థులు 2 గంటల ముందుగానే కేంద్రాలకు చేరుకోవాలని, తనిఖీ చేసి 10:15 గంటలకు హాల్‌లోకి పంపిస్తారని చెప్పారు. కేంద్రాల దగ్గర అభ్యర్థులకు ఎలాంటి అసౌకర్యం కలుగకుండా మౌలిక వసతులు కల్పించాలని, పోలీసుల ఆధ్వర్యంలో గట్టి బందోబస్తు ఏర్పాటు చేయాలని ఆదేశించారు. ప్రతి పరీక్షా కేంద్రం దగ్గర మెటల్‌ డిటెక్టర్‌, ఆరోగ్య శిబిరం అందుబాటులో ఉంచాలన్నారు. అభ్యర్థులు ఏదైనా గుర్తింపు కార్డును తప్పనిసరిగా తీసుకు రావాలన్నారు. ప్రతి మండలం నుంచి ప్రత్యేకంగా ఆర్టీసీ బస్సులను నడపాలని అధికారులను ఆదేశించారు.

22 కేంద్రాల్లో ఇంటర్‌ అడ్వాన్స్‌ పరీక్షలు

ఈ నెల 12 నుంచి 20 వరకు ఇంటర్మీడియట్‌ అడ్వాన్స్‌ సప్లిమెంటరీ పరీక్షలు 22 కేంద్రాల్లో జరుగుతాయని ఆయన తెలిపారు. ఈ పరీక్షలకు మొదటి, రెండో సంవత్సరం విద్యార్థులు కలిపి 7,797 మంది, వృత్తివిద్యా కోర్సులకు సంబంధించి 833 మంది హాజరుకానున్నట్లు పేర్కొన్నారు.