రిజర్వు ఎస్సైనంటూ బుకాయించాడు.. అడ్డంగా బుక్కయ్యాడు

ఘట్‌కేసర్‌, న్యూస్‌టుడే: నకిలీ పోలీసు వేషం కట్టి.. అమాయక ప్రజలను మోసగిస్తున్న ఓ యువకుడిని ఘట్‌కేసర్‌ పోలీసులు అరెస్టు చేసి రిమాండ్‌కు తరలించారు. సీఐ ఎం.మహేందరెడ్డి, ఎస్సై డి.అశోక్‌తేజ తెలిపిన వివరాల ప్రకారం.. ఘట్‌కేసర్‌ మండలం చౌదరిగూడ వెంకటసాయినగర్‌ ఫేజ్‌-2లో నివాసం ఉంటున్న కుసుమ ప్రశాంత్‌(26)కు చిన్నాటి నుంచి పోలీసు కావాలని కోరిక ఉంది. ప్రయత్నించినా పోలీసు ఉద్యోగం సాధించలేకపోయాడు. దాంతో నకిలీ పోలీసుగా తయారయ్యాడు. రిజర్వు ఎస్సై ఉద్యోగం వచ్చిందని కుటుంబ సభ్యులను, స్నేహితులను నమ్మించాడు. శిక్షణకు వెళ్తున్నట్లు చెప్పి వారికి కొన్ని రోజులు దూరంగా ఉన్నాడు. ఆ తరువాత పోలీసు యూనిఫారంలో దర్శనమిచ్చాడు. పోలీసుల ఉన్నతాధికారులతో మంచి సంబంధాలు ఉన్నాయని, ఏదైనా కేసు ఉంటే తనకు చెప్పాలని కలకుంట్ల ప్రసాద్‌ అనే వ్యక్తికి చెప్పాడు. అతను ఘట్‌కేసర్‌ పోలీసుస్టేషన్‌లో ఓ కేసు ఉందని పరిష్కరించాలని కోరాడు.

ఇలా దొరికిపోయాడు.. ప్రసాద్‌ కోరిక మేరకు ప్రశాంత్‌ ఘట్‌కేసర్‌ పోలీసుస్టేషన్‌కు వెళ్లి.. తాను రిజర్వు సబ్‌ఇన్‌స్పెక్టర్‌ అంటూ పరిచయం చేసుకున్నాడు. అందరికీ నమ్మకం కలిగించేలా చేశాడు. ఎస్సై డి.అశోక్‌తేజను పరిచయం చేసుకున్నాడు. వచ్చిన పని ఏమిటని అడిగాడు ఎస్సై.. తనకు తెలిసిన వారిని కొందరిని ఓ కేసులో పోలీసుస్టేషన్‌కు తీసుకొచ్చారని, ఎలాంటి కేసు లేకుండా చూడండి అంటూ వేడుకున్నాడు. తమ శాఖకు చెందిన వ్యక్తి కావడంతో చూద్దామని పంపించాడు. విచారణలో ఎస్సై అంటూ పరిచయం చేసుకున్న వ్యక్తి నకిలీ పోలీసని, విద్యార్థి అని గుర్తించారు. అతని చరవాణి తనిఖీ చేశారు. అందులో పోలీసు వేషంలో ఉన్న పలు ఫొటోలను గుర్తించారు. నిందితుడి నుంచి పోలీసు యూనిఫారం, రెండు చరవాణిలు, రూ.21,300 నగదు స్వాధీనం చేసుకున్నారు.