కనీస వసతుల కల్పనపై ప్రత్యేక దృష్టి

పనులను పరిశీలిస్తున్న అదనపు కలెక్టర్‌ రాహుల్‌శర్మ

మోమిన్‌పేట: గ్రామంలో మౌలిక వసుతలతో పాటు ఉచిత వైఫై సౌకర్యం కల్పించడం శుభపరిణామమని, ఇందుకు సర్పంచి నర్సింహారెడ్డి చొరవ తీసుకోవడం అభినందనీయమని అదనపు పాలనాధికారి రాహుల్‌శర్మ అన్నారు. సుపరిపాలనలో జాతీయ స్థాయిలో ఉత్తమ పంచాయితీ అవార్డు అందుకున్న చీమలదరి గ్రామాన్ని ఆయన శుక్రవారం సందర్శించి పలు అభివృద్ధి పనులను పరిశీలించి మాట్లాడారు. పురోగతిలో గ్రామస్థుల భాగస్వామ్యంతోనే జాతీయ స్థాయిలో గుర్తింపు లభించిందన్నారు. రోడ్ల పక్కన కుండీలను ఏర్పాటు చేయడంతో పరిసరాలు  శుభ్రంగా ఉన్నాయన్నారు. ప్రతి గ్రామంలో కనీస వసతుల కల్పనపై ప్రత్యేక దృష్టి సారించాలని ఎంపీడీవో శైలజారెడ్డికి సూచించారు. దశాబ్ది వనంలో మొక్కల సంరక్షణకు పక్కాగా ఉండాలని ఎంపీవో యాదగిరికి చెప్పారు. సర్పంచి నర్సింహారెడ్డి కార్యదర్శి సుగుణ, పంచాయతీ సిబ్బంది తదితరులు పాల్గొన్నారు.