పైవంతెన నిర్మించాలంటూ మృతదేహంతో ధర్నా

మృతదేహంతో రోడ్డుపై గ్రామస్థుల ఆందోళన

శంషాబాద్‌: రోడ్డు ప్రమాదంలో ఒకరు మృతిచెందిన సంఘటనకు పైవంతెన లేకపోవడమే కారణమంటూ శంషాబాద్‌లో బస్తీవాసులు జాతీయ రహదారిపై ఆందోళన చేసిన ఉదంతమిది. శంషాబాద్‌లోని సిద్ధాంతి బస్తీకి చెందిన జక్కుల యాదయ్య(62) శుక్రవారం సాయంత్రం ఇంటికి వెళ్లడానికి సిద్ధాంతి బస్టాప్‌ వద్ద జాతీయ రహదారిని దాటుతుండగా ఓ బైక్‌ ఢీకొట్టింది. తీవ్రగాయాలతో చికిత్స పొందుతూ శనివారం మృతి చెందాడు. పైవంతెన లేకపోవడంతోనే మృత్యువాత పడుతున్నారని బస్తీవాసులు హైవేపై మృతదేహంతో ఆందోళనకు దిగారు. దీంతో ట్రాఫిక్‌ స్తంభించి విమానాశ్రయానికి వెళ్తున్న ప్రయాణికులు ఇబ్బందులకు గురయ్యారు. సమాచారం అందుకున్న శంషాబాద్‌ ఏసీపీ రామచంద్రారావు, ఆర్జీఐఏ సీఐ శ్రీనివాస్‌, ట్రాఫిక్‌ సీఐ రాజు ఆందోళనకారులను సముదాయించారు.