తెలంగాణలో ఎకో టూరిజం అభివృద్ధికి కృషి

సదస్సు ప్రారంభిస్తున్న ప్రభుత్వ ప్రధాన కార్యదర్శి శాంతికుమారి

మొయినాబాద్‌, న్యూస్‌టుడే: తెలంగాణలో మూడేళ్లలో ప్రకృతి పర్యాటకం(ఎకో టూరిజం) అభివృద్ధి చేసి దేశంలోనే ప్రథమ స్థానంలో నిలపడానికి కృషి చేస్తామని రాష్ట్ర ప్రభుత్వ ప్రధాన కార్యదర్శి శాంతికుమారి అన్నారు. రంగారెడ్డి జిల్లా మొయినాబాద్‌లోని ‘మృగవని రిసార్టు’లో రెండు రోజుల ఎకో టూరిజం సదస్సును మంగళవారం అటవీ అభివృద్ధి సంస్థ ఛైర్మన్‌ వంటేరు ప్రతాప్‌రెడ్డి, అటవీశాఖ ప్రధాన అధికారి ఆర్‌ఎం డొబ్రియాల్‌, టీఎస్‌ఎఫ్‌డీసీ వైస్‌ ఛైర్మన్‌ అండ్‌ ఎండీ డా.జి.చంద్రశేఖర్‌రెడ్డితో కలిసి ప్రారంభించారు. వంటేరు ప్రతాప్‌రెడ్డి మాట్లాడుతూ.. హైదరాబాద్‌ చుట్టుపక్కల ప్రాంతాలతో పాటు ఇతర జిల్లాల్లోనూ పర్యాటకం అభివృద్ధికి చర్యలు చేపట్టినట్లు తెలిపారు. వరంగల్‌, ఆదిలాబాద్‌, హైదరాబాద్‌, రంగారెడ్డి జిల్లాల్లో, సత్తుపల్లిలో అటవీ అభివృద్ధి సంస్థ విజయవంతంగా ప్రకృతి పర్యాటక కేంద్రాలను సిద్ధం చేసినట్లు టీఎస్‌ఎఫ్‌డీసీ వైస్‌ఛైర్మన్‌ అండ్‌ ఎండీ చంద్రశేఖర్‌రెడ్డి తెలిపారు. సదస్సులో కర్ణాటక, కేరళ, తమిళనాడు రాష్ట్రాలకు చెందిన ఐఎఫ్‌ఎస్‌, జిల్లా అటవీ అధికారులు హాజరయ్యారు.