కృత్రిమ మేధతో భారత రక్షణ రంగం బలోపేతం

లెఫ్టినెంట్‌ జనరల్‌ తుముల్‌ వర్మ, జేఎస్‌ సిడానా,  ఐటీ ముఖ్య కార్యదర్శి జయేశ్‌రంజన్‌లతో ఆర్మీ అధికారులు

కంటోన్మెంట్‌, న్యూస్‌టుడే: కృత్రిమ మేధ వినియోగంతో భారత రక్షణ రంగం మరింత బలోపేతం చెందుతుందని ఎలక్ట్రానిక్స్‌ మెకానికల్‌ ఇంజినీర్స్‌(ఈఎంఈ) డైరెక్టర్‌ జనరల్‌ లెఫ్టినెంట్‌ జనరల్‌ తుముల్‌ వర్మ పేర్కొన్నారు. తిరుమలగిరిలోని మిలిటరీ కాలేజ్‌ ఆఫ్‌ ఎలక్ట్రానిక్స్‌ మెకానికల్‌ ఇంజినీరింగ్‌(ఎంసీఈఎంఈ) ఆడిటోరియంలో ‘భారత రక్షణ రంగంలో కృత్రిమ మేధస్సు పరికరాల వినియోగం’ అంశంపై రెండు రోజుల సదస్సు మంగళవారం ముగిసింది. కృత్రిమ మేధస్సుతో తయారుచేసే బిగ్‌ డేటా, రోబోటిక్స్‌, క్వాంటమ్‌ కంప్యూటింగ్‌, డ్రోన్‌ సాంకేతికతలను రక్షణ రంగంలో వినియోగించాల్సిన అవసరముందన్నారు. ఐటీ శాఖ ముఖ్య కార్యదర్శి జయేశ్‌రంజన్‌ మాట్లాడుతూ.. భారత సైన్యాన్ని మరింత పటిష్టం చేయడమే లక్ష్యంగా ఎంసీఈఎంఈ ముందుకెళ్తుండటం శుభ పరిణామమన్నారు. రాష్ట్ర ప్రభుత్వం తెలంగాణ కృత్రిమ మేధస్సు మిషన్‌(టీఏఐఎం)ను ప్రారంభించి ప్రయోగాలు చేస్తోందని, ఎంసీఈఎంఈ టీఏఐఎంతో కలిసి పనిచేస్తే అద్భుతాలు సృష్టించవచ్చని ఆయన సూచించారు.