బాధిత రైతులను ఆదుకోవాలి : పుత్తా

 గోనుమాకులపల్లెలో దెబ్బతిన్న మినుము పంటను పరిశీలిస్తున్న 
తెదేపా రాష్ట్ర ఉపాధ్యక్షుడు పుత్తా నరసింహారెడ్డి

పెండ్లిమర్రి, వీరపునాయునిపల్లె, న్యూస్‌టుడే: వరదలతో పంటలు నష్టపోయిన ప్రతి రైతుకు ప్రభుత్వం నష్ట పరిహారం అందించాలని తెదేపా రాష్ట్ర ఉపాధ్యక్షుడు పుత్తా నరసింహరెడ్డి డిమాండు చేశారు. పెండ్లిమర్రి, వీరపునాయునిపల్లె మండలాల పరిధిలో ఇటీవల కురిసిన భారీ వర్షాలకు దెబ్బతిన్న పంటలను శనివారం ఆయా గ్రామాల రైతులతో కలిసి పరిశీలించారు. ఈ సందర్భంగా కొండూరు వాసులు తమ పంటలు నష్టపోయామని వ్యవసాయాధికారులకు చెప్పినా పంట నష్టం వివరాల నమోదులో తమ పేర్లు చేర్చడం లేదని పుత్తా దృష్టికి తెచ్చారు. దీంతో కడప డివిజన్‌ వ్యవసాయ శాఖ ఏడీ నరసింహారెడ్డితో ఫోన్‌లో మాట్లాడారు. రాజకీయాలకు అతీతంగా నష్టపోయిన ప్రతి రైతుకు నష్టపరిహారం అందించాలని కోరారు. అనంతరం వీరపునాయునిపల్లె మండలం గోనుమాకులపల్లె, కదిరేపల్లె, రాజుపాలెం, తాటిమాకులపల్లె గ్రామ సమీపంలోని పంట పొలాలను పరిశీలించారు. కార్యక్రమంలో ఎస్పీ గంగిరెడ్డి, శ్రీనివాసులురెడ్డి, ఈశ్వర్‌రెడ్డి, అన్నమయ్య, మాజీ ఎంపీపీ ప్రసాదరెడ్డి, భాస్కరరెడ్డి పాల్గొన్నారు.