ముస్లిం తొలి కథానికుడు సత్యాగ్ని

మాట్లాడుతున్న బుద్ధప్రసాద్‌

యోవేవి(కడప), న్యూస్‌టుడే : తెలుగు సాహిత్యంలో ముస్లింల జీవిత స్థితిగతులను మైనార్టీ వాదం ఏర్పడక మునుపే కథల ద్వారా వెలుగులోకి తెచ్చిన ముస్లింవాద పితామహుడు షేక్‌ హుస్సేన్‌ సత్యాగ్ని అని మాజీ మంత్రి మండలి బుద్ధప్రసాద్‌ అన్నారు. ఆదివారం సీపీ బ్రౌన్‌ భాషా పరిశోధన కేంద్రంలో కేంద్రం బాధ్యుడు మల్లికార్జునరెడ్డి ఆధ్వర్యంలో షేక్‌ హుస్సేన్‌ సత్యాగ్ని రచించిన దివార్‌ పుస్తకావిష్కరణ సభ నిర్వహించారు. ముఖ్య అతిథిగా హాజరైన మండలి బుద్ధప్రసాద్‌ మాట్లాడారు. కేంద్ర సాహిత్య అకాడమీ పురస్కార గ్రహీత కేతు విశ్వనాథరెడ్డి మాట్లాడుతూ.. సత్యాగ్నిలో కవి, నటుడు, పాత్రికేయుడు, కథకుడు, రాజకీయనాయకుడు తదితర వివిధ కోణాలున్నాయన్నారు. కార్యక్రమంలో పద్మావతి మహిళా విశ్వవిద్యాలయ ఆచార్యులు మధుజ్యోతి, సాహిత్య విమర్శకులు తవ్వా వెంకటయ్య, రచయితలు, కవులు పుత్తా పుల్లారెడ్డి, పుత్తా బాలిరెడ్డి, ఓబుళరెడ్డి, జానమద్ది విజయభాస్కర్‌, మాచిరెడ్డి, సంజీవమ్మ, అలపర్తి పిచ్చయ్యచౌదరి తదితరులు పాల్గొన్నారు.