అంగన్‌వాడీ కార్యకర్త దారుణ హత్య

జాలా వసుంధర (దాచిన చిత్రం)

బ్రహ్మంగారిమఠం, న్యూస్‌టుడే: మండలంలోని జౌకుపల్లె ఎస్సీ కాలనీకి చెందిన అంగన్వాడీ కార్యకర్త జాలా వసుంధర (34) శుక్రవారం రాత్రి దారుణ హత్యకు గురయ్యారు. జౌకుపల్లెలో జాలా వసుంధర భర్త ప్రభాకర్‌తో కలసి నివాసం ఉంటున్నారు. కొంతకాలంగా ఇద్దరి మధ్య తలెత్తిన విభేదాల నేపథ్యంలో పరస్పరం స్థానిక పోలీసుస్టేషన్‌లో ఫిర్యాదు చేసుకున్నారు. రాత్రి ఇంటి నుంచి గట్టిగా కేకలు వినిపించడంతో చుట్టుపక్కల వారు అక్కడికి వెళ్లి చూడగా అప్పటికే వసుంధర రక్తపు మడుగులో శవమై ఉన్నట్లు వారు తెలిపారు. విషయం తెలుసుకున్న ఎస్సై శ్రీనివాసులు ఘటనా స్థలానికి చేరుకున్నారు. కేసు నమోదు చేసి దర్యాప్తు చేస్తున్నట్లు తెలిపారు. భర్త ప్రభాకర్‌ కోసం గాలిస్తున్నట్లు ఎస్సై చెప్పారు. హతురాలికి ఇద్దరు కుమారులు ఉన్నారు.