రహదారి ప్రమాదంలో యువతి మృతి

చింతకొమ్మదిన్నె, యోవేవి, న్యూస్‌టుడే : మండల పరిధిలోని ఆజాద్‌నగర్‌ వద్ద స్కూటీలో వెళ్తుండగా అదుపు తప్పి కింద పడి సగిలి సునీత (22) అనే యువతి మృతి చెందారు. ఏఎస్సై నాగరాజు వివరాల ప్రకారం... మండలంలోని ఇందిరానగర్‌ చెర్లోపల్లెకు చెందిన సునీత ఎంబీఎ పూర్తి చేసి, ఉద్యోగ ప్రయత్నంలో ఉన్నారు. శుక్రవారం రాత్రి తన స్కూటీలో కడప నగరంలోని దుర్గమ్మ ఆలయానికి వెళ్లి తిరిగి ఇంటికి బయల్దేరారు. ఆజాద్‌నగర్‌ వద్దకు రాగానే రోడ్డుపై ఉన్న గుంతపై నుంచి తన స్కూటీ వెళ్లడంతో అదుపు తప్పి సునీత కింద పడ్డారు. తీవ్రంగా గాయపడిన ఆమెను రిమ్స్‌కు తరలించగా చికిత్స పొందుతూ మృతి చెందారు.  విద్యార్థినిమృతికి యోవేవి ఉపకులపతి సూర్యకళావతి, కులసచివులు విజయరాఘవ ప్రసాద్, ప్రిన్సిపల్‌ కృష్ణారెడ్డి,  ఆలుమ్ని సంఘం ప్రతినిధులు సంతాపం ప్రకటించారు.