వివాహం కాలేదని యువకుడి ఆత్మహత్య

లింగాల, న్యూస్‌టుడే: వివాహం కాలేదని ఓ యువకుడు మనస్తాపంతో లింగాల కుడి కాల్వలో దూకి ఆత్మహత్య చేసుకున్న ఘటన పార్నపల్లెలో చోటు చేసుకుంది. ఎస్సై హృషికేశ్వరరెడ్డి వివరాల ప్రకారం... అనంతపురం జిల్లా తాడిమర్రి మండలం తురకవారిపల్లెకు చెందిన కె.నాగార్జున (30) పెళ్లి కావట్లేదని తరచూ మనోవేదనకు గురయ్యేవాడు. ఇదే క్రమంలో గత శుక్రవారం ఇంటి నుంచి బయటకు వెళ్లిన అతను తిరిగి రాలేదు. అప్పటి నుంచి కుటుంబ సభ్యులు బంధువులను విచారించినా ప్రయోజనం లేకపోయింది. శనివారం పీబీసీ కార్యాలయం ఎదురుగా ఉన్న కుడికాల్వలో మృతదేహం కొట్టుకురాగా గ్రామస్తులు  పోలీసులకు సమాచారం అందించారు. తండ్రి శివయ్య ఇచ్చిన ఫిర్యాదు మేరకు కేసు నమోదు చేసుకొని దర్యాప్తు చేపట్టామని ఎస్సై తెలిపారు.