చైతన్య పరచడమే ప్రజానాట్య మండలి లక్ష్యం

 జెండాను ఆవిష్కరిస్తున్న ఏపీ ప్రజా నాట్యమండలి రాష్ట్ర అధ్యక్షుడు గని

మారుతీనగర్‌(కడప), న్యూస్‌టుడే : ప్రజా నాట్యమండలి ఆశయ సాధనకు కళాకారులు పునరంకితం కావాలని ఏపీ ప్రజా నాట్యమండలి రాష్ట్ర అధ్యక్ష, ప్రధాన కార్యదర్శులు గని, చంద్రానాయక్‌ పేర్కొన్నారు.  ప్రజానాట్య మండలి రాష్ట్ర మహాసభల్లో భాగంగా కడప కళాక్షేత్రంలో బుధవారం వ్యవస్థాపక దినోత్సవం నిర్వహించారు. ఈ సందర్భంగా వారు మాట్లాడుతూ ప్రజల అభ్యున్నతి, చైతన్యం కోసం ప్రజా నాట్య మండలి గత 79 ఏళ్లుగా అవిశ్రాంత కృషి చేస్తోందన్నారు. పాలకులు ప్రజల అభివృద్ధి, సంక్షేమాన్ని పక్కనపెట్టి ప్రజల మధ్య విభేదాలు సృష్టిస్తున్నారన్నారు. అనంతరం కళాకారులు ప్రదర్శించిన నృత్య ప్రదర్శనలు, కోలాటం, చెక్కభజన, కర్రసాము, కత్తి విన్యాసాలు అలరించాయి. కార్యక్రమంలో రాష్ట్ర నాయకులు పిచ్చయ్య, చంద్రశేఖర్, లక్ష్మీనారాయణ, చంద్ర, అంకుశం, విశ్వనాథ నాయక్‌ తదితరులు పాల్గొన్నారు.