ఖైదీలకు ఆరోగ్యశ్రీ అమలుకు ప్రయత్నం

జైళ్లశాఖ ఐజీ ఇండ్ల శ్రీనివాస్‌

కడప నేరవార్తలు, న్యూస్‌టుడే : రాష్ట్ర వ్యాప్తంగా జైళ్లలోని ఖైదీలకు ఆరోగ్యశ్రీ పథకం వర్తింపజేయాలని ప్రభుత్వానికి ప్రతిపాదనలు పంపామని జైళ్ల శాఖ ఐజీ ఇండ్ల శ్రీనివాస్‌ తెలిపారు. రాష్ట్ర వ్యాప్తంగా జైళ్లలో సంస్కరణల అమలు తీరు బాగుందని కితాబిచ్చారు. కడప నగర సమీపంలోని ప్రత్యేక మహిళా కారాగారంలో ఓ విచారణ నిమిత్తం బుధవారం ఆయన వచ్చారు. ఈ సందర్భంగా ఆయన మాట్లాడుతూ రాష్ట్ర వ్యాప్తంగా 20 పెట్రోలు బంకులు నడుస్తున్నాయని, ఖైదీల ఆధ్వర్యంలో మొదటి పెట్రోలు బంకు కడపలోనే ఏర్పాటు చేశామన్నారు. వార్డర్లను సొంత జిల్లాలకు కేటాయించడంలో కొన్ని సాంకేతికపరమైన ఇబ్బందులున్నాయని, దానిపై ఆలోచిస్తున్నామన్నారు. 2021, ఆగస్టులో ఖైదీల విడుదలకు ప్రతిపాదనలు పంపామని, అనుమతి రాగానే ఖైదీల విడుదల ఉంటుందని ఆయన వివరించారు.