జిల్లాలో తొలి ఒమిక్రాన్‌ కేసు నమోదు

సెంటినరీకాలనీ, న్యూస్‌టుడే: కొవిడ్‌ కేసులు పెరుగుతున్న దశలో జిల్లాలో తొలి ఒమిక్రాన్‌ కేసు నమోదు కావడంతో ఆందోళన వ్యక్తమవుతోంది. రామగిరి మండలం సెంటినరీకాలనీకి చెందిన సింగరేణి కార్మికుడు ఒమిక్రాన్‌ బారిన పడ్డాడు. ఓసీపీ-2లో ఈపీ ఫిట్టర్‌ కమ్‌ మెకానిక్‌గా విధులు నిర్వర్తిస్తున్న సదరు కార్మికుడు అమెరికాలో ఉన్న కుమారుల వద్దకు వెళ్లి ఇటీవలే కాలనీకి వచ్చారు. స్వల్పంగా జ్వరం, జలుబు, దగ్గు ఉండటంతో ఈ నెల 3న స్థానిక సింగరేణి డిస్పెన్సరీలో పరీక్షలు చేయించుకోగా కరోనా పాజిటివ్‌ వచ్చింది. అప్పటి నుంచి గోదావరిఖనిలోని సింగరేణి ప్రాంతీయ ఆసుపత్రిలో చికిత్స పొందుతున్నాడు. ఈ నెల 4న అతడి నమూనాలను జన్యు క్రమ విశ్లేషణకు పంపించగా, శుక్రవారం ఒమిక్రాన్‌ నిర్ధారణ అయింది. 11 రోజలుగా ఆసుపత్రిలో చికిత్స పొందుతున్న కార్మికుడు ఆరోగ్యంగానే ఉన్నట్లు వైద్యులు తెలిపారు.