అంజన్న క్షేత్రం భక్తజన సంద్రం

ఆలయం ముందు భక్తుల రద్దీ

మల్యాల, న్యూస్‌టుడే : కొండగట్టు ఆంజనేయస్వామి క్షేత్రం మంగళవారం భక్తజన సంద్రంగా మారింది. సమ్మక్క సారలమ్మ జాతర సమీపిస్తున్న కొద్ది ప్రతి శని, మంగళవారాల్లో వేలాదిగా భక్తులు తరలివస్తున్నారు. వేములవాడ రాజన్న, కొండగట్టు అంజన్న, ధర్మపురి నరసింహస్వామిని దర్శించుకొని సమ్మక్క జాతరకు వెళ్లడం ఆనవాయితీ. దీంతో వేకువజామునే అధిక సంఖ్యలో తరలివచ్చిన భక్తులు స్వామివారిని దర్శించుకొని బారులు తీరారు. దాదాపు 50 వేలకుపైగా భక్తులు తమ ఇష్టదైవాన్ని దర్శించుకొని వెళ్లారని ఆలయ వర్గాలు తెలిపాయి. భక్తుల రద్దీని దృష్టిలో ఉంచుకుని అదనంగా రెండు ప్రసాదం కౌంటర్లు తెరిచారు. కొండపైన బస్టాండు ముందుగల ఖాళీ స్థలం భక్తుల వాహనాలతో కిక్కిరిపోయింది. ఆలయ అధికారులు ఏర్పాట్లు పర్యవేక్షించారు.

బస్టాండు ముందు ఖాళీ స్థలంలో నిలిపిన భక్తుల వాహనాలు