అంతర్‌ రాష్ట్ర దొంగ అరెస్టు

పర్చూరు, న్యూస్‌టుడే: ఉభయ తెలుగు రాష్ట్రాల్లో చోరీలకు పాల్పడుతున్న వ్యక్తిని గురువారం అరెస్టు చేసినట్లు ప్రకాశం జిల్లా చీరాల డీఎస్పీ పి.శ్రీకాంత్‌ తెలిపారు. జిల్లాలోని సంతనూతలపాడుకు చెందిన తన్నీరు శ్రీనుపై తెలంగాణలో 3, ఆంధ్రప్రదేశ్‌లో 9 కేసులు ఉన్నాయి. పర్చూరు పరిధిలో 2, వేటపాలెం, అద్దంకి స్టేషన్ల పరిధిలో ఒక్కో కేసుకు సంబంధించి 22 గ్రాముల బంగారు ఆభరణాలు, వెండి సామగ్రి స్వాధీనం చేసుకున్నట్లు డీఎస్పీ వెల్లడించారు. ఇంకొల్లు సీఐ సుబ్బారావు ఆధ్వర్యంలో ప్రత్యేక బృందం నిఘా ఉంచి పర్చూరు వై జంక్షన్‌లో నిందితుడిని గుర్తించి ఎస్సై రమణయ్య అరెస్టు చేశారు. తాళం వేసి ఉన్న ఇళ్లను లక్ష్యంగా చేసుకుని చోరీలకు పాల్పడుతున్నట్లు విచారణలో తేలిందన్నారు. ఏపీలోని పర్చూరు, టంగుటూరు, ఒంగోలు, నాగులుప్పలపాడు, అద్దంకి, వేటపాలెం, చినగంజాం, తెలంగాణలోని రామగుండం(పెద్దపల్లి జిల్లా), సుబేదారి(వరంగల్‌), హుస్నాబాద్‌(సిద్దిపేట) స్టేషన్‌లలో నిందితుడిపై కేసులు ఉన్నట్లు డీఎస్పీ వివరించారు.