ఎనిమిది జంటలకు సామూహిక వివాహాలు

జీలకర్ర బెల్లం పెట్టుకుంటున్న వధూవరులు

పెద్దపల్లి, న్యూస్‌టుడే: పెద్దపల్లి జిల్లాకేంద్రంలో బుధవారం ఆసరా ఫౌండేషన్‌ స్వచ్ఛంద సంస్థ ఆధ్వర్యంలో ఎనిమిది జంటలకు సామూహిక వివాహాలు జరిపించారు. పట్టణంలోని జూనియర్‌ కళాశాల మైదానంలో ప్రత్యేకంగా ఏర్పాటు చేసిన వేదికపై ఒకే ముహూర్తానికి కల్యాణం నిర్వహించారు. సంస్థ వ్యవస్థాపకులు పెంట రాజేశ్‌ దంపతులు పలువురి కాళ్లు కడిగి కన్యాదానం చేశారు. మాట్లాడుతూ వివాహ ఖర్చు భరించలేక ఇబ్బందులు పడుతున్న పేద తల్లిదండ్రులకు అండగా నిలిచేందుకే ఈ కార్యక్రమం చేపట్టినట్లు రాజేశ్‌ చెప్పారు. వేడుక అనంతరం వధూవరుల బంధువులకు భోజనం ఏర్పాటు చేశారు. పెద్దపల్లి, రామగుండం ఎమ్మెల్యేలు మనోహర్‌రెడ్డి, చందర్‌, మాజీ ఎమ్మెల్యే బిరుదు రాజమల్లు తదితరులు వేడుకకు హాజరై వధూవరులను ఆశీర్వదించారు.