జోనల్‌ విధానంతో స్థానికులకే ఉద్యోగాలు

రాష్ట్ర ప్రణాళిక సంఘం ఉపాధ్యక్షుడు వినోద్‌కుమార్‌

వారధి స్టడీ సర్కిల్‌లో మాట్లాడుతున్న ప్రణాళిక సంఘం ఉపాధ్యక్షుడు వినోద్‌కుమార్‌, పక్కన మేయర్‌ సునీల్‌రావ్యు

రాంపూర్‌(కరీంనగర్‌), న్యూస్‌టుడే: స్థానికులకే ప్రభుత్వ ఉద్యోగాలు దక్కాలనే లక్ష్యంతో తెలంగాణ రాష్ట్ర ప్రభుత్వం నూతన జోనల్‌ వ్యవస్థను ఏర్పాటు చేసిందని రాష్ట్ర ప్రణాళిక సంఘం ఉపాధ్యక్షుడు బోయినపల్లి వినోద్‌కుమార్‌ పేర్కొన్నారు. స్థానిక కృషి భవన్‌లో ప్రతిమ ఫౌండేషన్‌ ఆధ్వర్యంలో కొనసాగుతున్న వారధి స్టడీ సర్కిల్‌తో పాటు ఎస్సీ స్టడీ సర్కిళ్లను ఆయన బుధవారం సందర్శించి బోధన, ఇతర వసతి సదుపాయాలపై యువతను అడిగి తెలుసుకున్నారు. ఈ సందర్భంగా వినోద్‌కుమార్‌ మాట్లాడుతూ.. నాలుగేళ్లుగా తమ సొంత ఖర్చులతో ప్రతిమ ఫౌండేషన్‌ ద్వారా నిరుద్యోగ యువతకు ఉచిత శిక్షణ తరగతులు నిర్వహిస్తున్నట్లు వివరించారు. రాష్ట్ర ప్రభుత్వం ఉద్యోగాల ప్రకటన విడుదల చేసిన నేపథ్యంలో గత ఏడాది మాదిరిగానే ప్రస్తుతం 150 మంది నిరుద్యోగ యువతీ, యువకులకు ఉచిత బోధన, శిక్షణ తరగతులను ఏర్పాటు చేశామన్నారు. నిరుద్యోగ యువత కష్టపడి ప్రభుత్వ కొలవులను సొంతం చేసుకోవాలని సూచించారు. ముఖ్యమంత్రి కేసీఆర్‌ ఉద్యోగావకాశాల్లో ఎలాంటి పైరవీలకు తావుండొద్దనే సంకల్పంతోనే ఇంటర్వ్యూ పద్ధతి తొలగించారని తెలిపారు. కావాల్సిన వసతులను కల్పించాలని మేయర్‌, డెయిరీ ఛైర్మన్‌లకు సూచించారు.  మేయర్‌ వై.సునీల్‌రావు మాట్లాడుతూ.. వినోద్‌కుమార్‌ ఆదేశాల మేరకు రూ.5 భోజన సదుపాయం కల్పిస్తామన్నారు. ఉచితంగా మజ్జిగ ప్యాకెట్లు అందిస్తామని డెయిరీ ఛైర్మన్‌ సి.హెచ్‌.రాజేశ్వర్‌రావు పేర్కొన్నారు. కార్యక్రమంలో తెరాస నాయకులు జక్కుల నాగరాజు, ప్రాథమిక సహకార సంఘం ఛైర్మన్లు వి.వెంకటేశ్వర్‌రావు, రాజనర్సింహారావు పాల్గొన్నారు. ఎస్సీ స్టడీ సర్కిల్‌లోని అభ్యర్థులు వినోద్‌కుమార్‌ను కలిసి ఉద్యోగ పరీక్షలకు సన్నద్ధమయ్యేందుకు స్టడీ సర్కిల్‌లో మరో రెండు నెలల పాటు అవకాశం కల్పించాలని కోరారు.