ప్రభుత్వం అన్ని వర్గాలను ఆదుకుంటోంది

రాష్ట్ర మంత్రి గంగుల కమలాకర్‌

పనులు పరిశీలిస్తున్న మంత్రి కమలాకర్‌, మేయర్‌ సునీల్‌రావు

కార్పొరేషన్‌, న్యూస్‌టుడే: చిరువ్యాపారుల జీవనోపాధికి నాలుగు చోట్ల వెండింగ్‌ జోన్లు నిర్మిస్తున్నట్లు రాష్ట్ర బీసీ సంక్షేమ, పౌరసరఫరాల శాఖ మంత్రి గంగుల కమలాకర్‌ అన్నారు. ఆదివారం నగరంలోని 43వ డివిజన్‌ సవారన్‌వీధిలో కొత్తగా నిర్మిస్తున్న వెండింగ్‌ జోన్‌ పనులను మేయర్‌ వై.సునీల్‌రావుతో కలిసి పరిశీలించారు. ఈ సందర్భంగా ఆయన మాట్లాడుతూ.. తెలంగాణ రాష్ట్ర ప్రభుత్వం అన్ని వర్గాలను ఆదుకుంటుందన్నారు. నూతనంగా నిర్మిస్తున్న వెండింగ్‌ జోన్‌లో 50మంది వ్యాపారులకు సరిపడా షెట్టర్‌తో కూడిన దుకాణాలను నగరపాలిక నిర్మిస్తుందని చెప్పారు. కార్యక్రమంలో కార్పొరేటర్లు సరిళ్ల ప్రసాద్‌, ఐలేందర్‌యాదవ్‌, దిండిగాల మహేశ్‌, నాయకులు ఉన్నారు.

* దళితబంధు మొదటి విడతలో ఎంపికైన 44వ డివిజన్‌కు చెందిన మద్దూరి మాధవి శ్రీధర్‌కు మంత్రి గంగుల కమలాకర్‌ చేతుల మీదుగా వాహనం అందించారు. ఆదివారం డివిజన్‌లో జరిగిన కార్యక్రమంలో మంత్రితో పాటు మేయర్‌ వై.సునీల్‌రావు, కార్పొరేటర్లు మెండి శ్రీలత, చంద్రశేఖర్‌, సరిళ్ల ప్రసాద్‌, నాయకులు చల్లా హరిశంకర్‌ పాల్గొన్నారు