హుజూరాబాద్‌లో భారీ తిరంగా జెండా ప్రదర్శన

అంబేడ్కర్‌ కూడలి చుట్టూ జెండా ప్రదర్శన

హుజూరాబాద్‌, న్యూస్‌టుడే:  స్వాతంత్య్ర వజ్రోత్సవ వేడుకల్లో భాగంగా  భాజపా పట్టణశాఖ ఆధ్వర్యంలో హుజూరాబాద్‌లో  300 మీటర్ల జాతీయ జెండాలతో భారీ ప్రదర్శన యాత్ర చేపట్టారు. బుధవారం సాయంత్రం భాజపా కార్యకర్తలు అంబేడ్కర్‌ కూడలికి  ప్రదర్శనగా చేరుకున్నారు. నినాదాలతో కూడలి చుట్టూ తిరిగారు. వేడుకలను ఉద్దేశించి పార్టీ జిల్లా అధ్యక్షుడు గంగాడి కృష్ణారెడ్డి మాట్లాడుతూ దేశ సమైఖ్యతను చాటే విధంగా  ప్రతి ఇంటిపై జెండాను ఎగురవేయాలనే కార్యాచరణతో ముందుకు వెళుతున్నట్లు పేర్కొన్నారు.  కార్యక్రమంలో భాజపా నేతలు గంగిశెట్టి రాజు, వెంకట్‌రెడ్డి, ప్రవీణ్‌కుమార్‌, ముత్యంరావు, సుధాకర్‌, నరసింహరాజు, ఆదిరెడ్డి, సంపత్‌రావు,  పాల్గొన్నారు.