నేటి నుంచి ధర్మగుండంలో పుణ్యస్నానాలకు అనుమతి

సిద్ధం చేసిన రాజన్న ఆలయ ధర్మగుండం

వేములవాడ, న్యూస్‌టుడే: దక్షిణకాశీగా పేరొందిన ప్రసిద్ధ పుణ్యక్షేత్రమైన వేములవాడలోని శ్రీ రాజరాజేశ్వరస్వామి ఆలయ ధర్మగుండాన్ని ఆదివారం పునఃప్రారంభించేందుకు ఆలయ అధికారులు అన్ని ఏర్పాట్లు చేశారు. దాదాపు రెండున్నరేళ్ల క్రితం కొవిడ్‌ కారణంగా ధర్మగుండాన్ని ఆలయ అధికారులు మూసివేశారు. దేవాదాయ, ధర్మాదాయశాఖ కమిషనర్‌ నుంచి ఆదేశాలు రావడంతో తిరిగి తెరిపించేందుకు ఆలయ అధికారులు చర్యలు చేపట్టారు. ఇటీవల ఇందులో పూడిక తొలగించి శుభ్రం చేసి రంగులు వేశారు. ధర్మగుండంలో భక్తుల పుణ్యస్నానాలు ఆచరించేందుకు నీటిని నింపి సిద్ధం చేశారు. ధర్మగుండంలో ఆదివారం 8 గంటలకు అర్చకులు ప్రత్యేక పూజల అనంతరం భక్తులను పుణ్యస్నానాలకు అనుమతించనున్నారు. ఇందుకు అన్ని ఏర్పాట్లు చేసినట్లు ఆలయ అధికారులు తెలిపారు.