విధి నిర్వహణలో ఉపాధ్యాయిని హఠాన్మరణం

సునీత

మంథని గ్రామీణం, న్యూస్‌టుడే: విధి నిర్వహణలో ఉన్న ఉపాధ్యాయిని హఠాన్మరణం చెందిన విషాద ఘటన పెద్దపల్లి జిల్లా మంథని ప్రభుత్వ ఉన్నత పాఠశాలలో బుధవారం చోటు చేసుకుంది. తోటి ఉపాధ్యాయుల వివరాల ప్రకారం.. సైన్స్‌ టీచర్‌ తన్నీరు సునీత (37).. మంచిర్యాల నుంచి మంథని పాఠశాల విధులకు హాజరవుతున్నారు. విద్యార్థులకు పాఠం బోధించి స్టాఫ్‌ రూమ్‌కు వచ్చి ఒక్కసారిగా కుప్పకూలారు. అప్రమత్తమైన తోటి సిబ్బంది వెంటనే 108కు సమాచారం అందించారు. పాఠశాలకు చేరుకున్న 108 సిబ్బంది ఆమె అప్పటికే మృతి చెందినట్లు తెలిపారు. గుండెపోటు కారణంగానే మృతి చెందినట్లు భావిస్తున్నామని పేర్కొన్నారు. అప్పటి వరకు తమతో ఉన్న ఉపాధ్యాయురాలు క్షణాల వ్యవధిలోనే మృతిచెందడాన్ని ఉపాధ్యాయులు, విద్యార్థులు జీర్ణించుకోలేకపోయారు. సునీత భర్త అంతర్గాం మండలంలో ప్రభుత్వ ఉపాధ్యాయుడిగా పని చేస్తుండగా.. వీరికి ఇద్దరు పిల్లలు ఉన్నారు.