సాంబ సదాశివాలయం పునర్నిర్మాణానికి అడుగులు

కొలనూరులో ఆలయ నిర్మాణానికి హోమం నిర్వహిస్తున్న రుత్వికులు, గ్రామస్థులు

ఓదెల, న్యూస్‌టుడే: ఓదెల మండలంలోని కొలనూరులో కాకతీయుల కాలం నాటి పురాతన సాంబ సదాశివాలయం శిథిలావస్థకు చేరిన నేపథ్యంలో ఆలయాన్ని ఇటీవల తొలగించిన విషయం విదితమే. నాటి రాతి స్తంభాలతో కూడిన ఆలయ పునర్నిర్మాణానికి గురువారం గ్రామంలో భూమిపూజ ఘనంగా నిర్వహించారు. ఈ మేరకు ఆలయ నిర్మాణానికి సీజీఎఫ్‌ నిధులు రూ.38 లక్షలు మంజూరయ్యాయి. స్థానికులు రూ.9.5 లక్షలు ఇచ్చారు. రూ.1.80 కోట్ల అంచనా వ్యయంతో ఆలయ నిర్మాణం చేయనున్నారు. మిగతా నిధులు దాతల సాయంతో సమకూర్చి పనులు పూర్తి చేసేందుకు ప్రణాళికలు చేశారు. కార్యక్రమంలో భాగంగా గణపతి పూజ, పుణ్యాహవచనం, నవగ్రహ సహిత ఏకాదశ వాస్తుపూజ, శిలామూర్తికి అభిషేకం, ఆలయ అడుగు భాగం భూగర్భంలో శిలా ప్రతిష్ఠాపనం, రుద్రహోమం, పూర్ణాహుతి తదితర కార్యక్రమాలను వైభవంగా చేపట్టారు. యాంసాని మోహన్‌దాస్‌ భక్తులకు అన్నదానం చేశారు. జడ్పీటీసీ సభ్యుడు గంట రాములు, సర్పంచులు సామ మణెమ్మ, మధు, మల్లారెడ్డి, ఎంపీటీసీ సభ్యుడు కారెంగుల శ్రీనివాస్‌, ఉప సర్పంచి పాకాల సంపత్‌రెడ్డి, మాజీ సర్పంచులు సామ శంకర్‌, కుంచం మల్లయ్య, ఆలయ కమిటీ బాధ్యులు, నాయకులు తదితరులు పాల్గొన్నారు.