ఆస్తి పంపకాల్లో వివాదం

కన్నతండ్రిని హత్య చేసిన తనయుడు

శంకరయ్య

గన్నేరువరం, న్యూస్‌టుడే : ఆస్తి పంపకాల విషయమై వివాదం చోటుచేసుకుని కోపోద్రిక్తుడైన తనయుడు కన్నతండ్రినే హత్య చేశాడు. కరీంనగర్‌ జిల్లా గన్నేరువరం మండలం జంగపల్లిలో ఈ ఘటన చోటుచేసుకుంది. పోలీసులు, స్థానికుల కథనం మేరకు.. జంగపల్లికి చెందిన అటికం శంకరయ్య (64), విజయ దంపతులకు 18 ఎకరాల వ్యవసాయ భూమి ఉంది. వీరికి ఇద్దరు కుమారులు, ఒక కుమార్తె సంతానం. చిన్న కుమారుడు వివాహమైన నెల రోజులకే మృతి చెందాడు. పెద్ద కుమారుడు రవీందర్‌, అతని భార్య సరిత పేరుపై శంకరయ్య ఇటీవల 9 ఎకరాల భూమిని రిజిస్ట్రేషన్‌ చేశాడు. మిగతా 10 ఎకరాల భూమి శంకరయ్య, ఆయన భార్య పేరుపై ఉంది. ఈ భూమి సోదరి స్వప్నకు ఇస్తాడేమోనని రవీందర్‌కు అనుమానం. ఈ విషయమై పలుమార్లు తండ్రితో వాగ్వాదానికి కూడా దిగాడు. శుక్రవారం సోదరి ఇంట్లో శుభకార్యం ఉండగా, తల్లిదండ్రులను ఆహ్వానించి తనను పిలవలేదని రవీందర్‌ కోపోద్రిక్తుడయ్యాడు. బుధవారం అర్ధరాత్రి మద్యం తాగి వచ్చి తండ్రితో ఆస్తి విషయమై వాదనకు దిగాడు. మాటమాట పెరగడంతో క్రికెట్‌ బ్యాట్‌తో శంకరయ్య తలపై కొట్టగా తీవ్ర రక్తస్రావమైంది. చుట్టుపక్కలవారు వెంటనే కరీంనగర్‌ ప్రభుత్వాసుపత్రికి తీసుకెళ్లారు. చికిత్స పొందుతూ కొద్దిసేపటికే ఆయన మృతి చెందాడు. సీˆఐ రమేశ్‌, ఎస్సై సురేందర్‌ సంఘటన స్థలాన్ని పరిశీలించారు. ఎలాంటి అవాంఛనీయ సంఘటనలు చోటుచేసుకోకుండా రవీందర్‌ భార్య సరితను, ఇద్దరు కుమారులతో కలిపి పుట్టింటికి పంపించారు. అంత్యక్రియలు కుమారుడు చేయడానికి వీల్లేదని శంకరయ్య భార్య విజయ తానే ఆ కార్యక్రమం నిర్వహించింది. రవీందర్‌ పోలీసుల అదుపులో ఉన్నట్లు సమాచారం.