ప్రశాంతంగా ముగిసిన ఇంటర్‌ పరీక్షలు

విద్యార్థుల కేరింత

జగిత్యాల, న్యూస్‌టుడే: జిల్లాలో ఇంటర్మీడియట్‌ పరీక్షలు ప్రశాంతంగా ముగిశాయి. బుధవారం ద్వితీయ సంవత్సరం ముగియగా 199 మంది విద్యార్థులు గైర్హాజరయ్యారు. 7127 మంది పరీక్ష రాయాల్సి ఉండగా 6928 మంది (97.2 శాతం) పరీక్షకు హాజరయ్యారు. ద్వితీయ సంవత్సరం పరీక్షలు ముగియడంతో విద్యార్థులు సంతోషంతో ఇళ్లకు పయనమయ్యారు. పరీక్ష కేంద్రాల వద్ద ఆనందంతో సహచర విద్యార్థులు వీడ్కోలు పలికారు. ఒకేషనల్‌ విద్యార్థులకు బ్రిడ్జి కోర్సు పరీక్షలు ఈనెల 31, ఏప్రిల్‌ 4న జరుగుతాయని జిల్లా పరీక్షల కన్వీనర్‌ బి.నారాయణ తెలిపారు. ఇందుకోసం 7 పరీక్ష కేంద్రాలను ఏర్పాటు చేసినట్లు ఆయన పేర్కొన్నారు.